အမျိုးသားခေါင်းဆောင်ကြီးရုပ်ပုံအသုံးချ၍ မဲဆွယ်သော်လည်း စောင်တစ်လွဲဖြစ်နေသဖြင့် အိန္ဒိယပါလီမန်အမတ်ကို အွန်လိုင်းတခွင် ဝေဖန်ဆဲဆိုမှုများဖြင့် အုံးအုံးထ

 
အိန္ဒိယအစိုးရဝန်ကြီးဟောင်းနှင့် လက်ရှိပါလီမန်အမတ်ဖြစ်သူက အမေရိကန်နိုင်ငံတွင် ကြိုဆိုနှုတ်ဆက်သူများဖြင့် စည်ကားနေသော ယခင်အိန္ဒိယဝန်ကြီးချုပ်ဖြစ်သူ၏ ဓါတ်ပုံဟု Twitter တွင် ဓါတ်ပုံတစ်ပုံ လွှင့်တင်ခဲ့သည်။ သို့သော် အဆိုပါဓါတ်ပုံမှာ အမေရိကန်တွင်မဟုတ်ပဲ ရုရှားနိုင်ငံတွင်ဖြစ်နေသဖြင့် အွန်လိုင်းတခွင် ဝေဖန်ဆဲဆိုမှုများဖြင့် အုံးအုံးထလျှက်ရှိသည်ဟု Russia Today က ယမန်နေ့ရေးသားသည်။ 

ရှာရှီထာရူး အမည်ရှိ အမတ်မင်းက Twitter ၌ လွှင့်တင်ခဲ့သော ဓါတ်ပုံတွင် အိန္ဒိယနိုင်ငံအား ကိုလိုနီထမ်းပိုး အောက်မှ ရုန်းထွက်စေရာ၌ ပါဝင်ခဲ့သဖြင့် လွတ်လပ်ရေးဗိသုကာအဖြစ်တင်စားခြင်းခံသူ ဝန်ကြီးချုပ်ဟောင်း ဂျဝါဟာလာနေရူးနှင့် ၎င်း၏သမီး နောင်ဝန်ကြီးချုပ်ဖြစ်လာသည့် အင်ဒီရာဂန္ဓီတို့၏ ရုပ်ပုံများပါဝင်သည်။ အဖြူအမည်းတွင် “၁၉၅၄-ခုနှစ် အမေရိကန်ရောက်ရှိစဉ် စိတ်ဝင်စားစွာကြိုဆိုနှုတ်ဆက်ကြသော လူထုကြီး နှင့်အတူတွေ့ရသည်” ဟု ပုံစာရေးထိုးထားသည်။ 

ကမ္ဘာ့ကုလသမဂ္ဂအထွေထွေအတွင်းရေးမှူး၏ ဆက်သွယ်ရေးနှင့် ပြန်ကြားရေးဋ္ဌာန၌ အလုပ်လုပ်ခဲ့ဖူးသူ ထာရူး၏ Twitter တွင် ယခုဓါတ်ပုံလွှင့်တင်ချိန်သည် လတ်တလော အမေရိကန်တွင် ဝန်ကြီးချုပ်မိုဒီ ရောက်ရှိချိန်နှင့် တိုက်ဆိုင်လျှက်ရှိသည်။ 

ဓါတ်ပုံပါ အကြောင်းအရာအမှန်မှာ ၁၉၅၅-ခုနှစ်က နေရူး၏ တရားဝင် ဆိုဗီယက်ချစ်ကြည်ရေးခရီးစဉ်ဖြစ်ပြီး သံချက်စက်ရုံအများတည်ရှိသဖြင့် သံမဏိမြို့တော်အဖြစ်တင်စားခြင်းခံရသော မက်ဂနီတတ်ဂွာရှ်မြို့၌ဖြစ်သည်။ 

သမိုင်းဝင်ဓါတ်ပုံအား ရက်စွဲနှင့်နေရာလွဲမှားစွာဖော်ပြခဲ့သည့်အပြင် အိန္ဒိယအမတ်မင်းသည် အိန္ဒိယလူမျိုးတို့၏ အမည်ကို အင်္ဂလိပ်ဘာသာဖြင့် ဖော်ပြရာ၌လည်း Indira Gandhi အင်ဒီရာဂန္ဓီ ဟု ရေးရမည့်အား India Gandhi အိန္ဒိယဂန္ဓီ ဟူ၍စာလုံးပေါင်း လွဲချော်လျှက်ရှိသည်ဆို၏။ 

အွန်လိုင်းတစ်ခွင် ဝေဖန်ဆဲဆိုမှုများဖြင့် အုံးအုံးထလျှက်ရှိသည့်တိုင် အမတ်မင်း ထာရူးက ဟာရီးမလျှော့ချေ။ ရုရှားဖြစ်စေ အမေရိကန်တွင်ဖြစ်စေ အိန္ဒိယနိုင်ငံတော်အတွက် ကောင်းသတင်းဆောင်သည့် ဝန်ကြီးချုပ်တစ်ဦး၏ ထူးခြားသော သမိုင်းဝင်ဖြစ်စဉ်ကို စေတနာမှန်နှင့် လွှင့်တင်ခဲ့ခြင်းသာဖြစ်ပြီး ၎င်း၏သတင်းပေးလိုသော ရည်ရွယ်မှာ အပျောက်ဆုံးခြင်းမရှိ အမှန်ပင်ဖြစ်ကြောင်း အထွန့်တက်ချေ၏။ 

နိုင်ငံရေးသမားတစ်ဦးက သတင်းအမှားကို နမော်နမဲ့ လွှင့်တင်ပြီး တောင်းပန်ရကောင်းမှန်း မသိရာ ရောက်သဖြင့် အိန္ဒိယလူမှုကွန်ယက်သုံးစွဲသူတို့က လက်ခံနိုင်ခြင်းမရှိပါ။ Follower များကို လေးစားလျှင် မတင်ခင်ကတည်းက လေ့လာသင့်- ပြန်လှန်စစ်ဆေးသင့်သည်ဟု ဆိုပါသည်။ 

အမတ်မင်းပြောသည့်အတိုင်း ဓါတ်ပုံတွင်ပါတိုင်း ဖော်ပြကြရလျှင် “ လကမ္ဘာရောက်နေရူး “ ဟောလိဝုဒ်ရုပ်ရှင် “ အင်ဒီယာနာဂျုံးနှင့် တွေ့ဆုံသည့် နေရူး “ စသည်ဖြစ် ကုန်ရောပေါ့ဟု ပြောင်လှောင် ကောမန့်များ ရေးသား ကြသည်ကို တွေ့ရှိရသည်။ 

(( အိန္ဒိယနိုင်ငံတွင် ရွေးကောက်ပွဲ ကျင်းပရန် ရှိနေပြီး အာဏာရ BJP ပါတီ၏ လူထုထောက်ခံမှုကို အဖြေထုတ်မည့် ပွဲလည်းဖြစ်သည်။ အောက်တိုဘာ ၂၁-ရက်နေ့တွင် အနောက်ပိုင်းနှင့် မြောက်ပိုင်းပြည်နယ်တို့တွင် စတင်ကျင်းပမည်ဖြစ်သည်။ 

ယမန်နေ့တွင် အမေရိကန်ရောက် အိန္ဒိယဝန်ကြီးချုပ် နရန်ဒရာမိုဒီသည် ဒေါ်နယ်ထရမ့်နှင့်အတူ လက်တွဲ၍ အိန္ဒိယနွယ်ဖွားလူထုကြီးအား ပြုံးရွှင်စွာနှုတ်ဆက်နေပုံတို့ အွန်လိုင်းတွင် ပလူပျံမျှ လွှင့်တင်နေကြပါသည်။ 

အိန္ဒိယဝန်ကြီးချုပ် Narendra Modi ၏ အနီးစပ်ဆုံး အသံထွက်မှာ “ နရန်ဒရာ (နရိန္ဒြာ ) “ ဖြစ်ပြီး သက္ကဋဘာသာ “ လူတို့၏အရှင် “ နာရာ Nara နှင့် “ ဟိန္ဒူနတ်ဘုရား အင်ဒရာ “ Indra ကို တွဲစပ်ထားခြင်းဖြစ်သည်။ 

“ နာရသိန် မိုဒီ “ ဟု ရေးသူတွေ့ဖူးရာ လုံးဝမှားယွင်းပါသည် ။ “နာရသိန်”ဆိုလျှင် “ အကျဉ်းခန်း၊ ထောင် “ ဟု အဓိပ္ပါယ်ရပါသည်။ ။ သတင်းဘာသာပြန်သူ )) 

( စက်တင်ဘာ – ၂၅၊ ၂၀၁၉ ) ((( Russia Today., 24 Sep, 2019,” ‘Do some research’: Indian politician blasted for posting PM Nehru Soviet visit photo as one from US.” ကို #HtayOung, #OungMarine ဆီလျှော်အောင် ကောက်နှုတ်ဘာသာပြန်ဆိုသည်။ ))) 

https://www.rt.com/news/469479-indian-politician-soviet-photo/ 

1+

Leave a Reply

Your email address will not be published.