ဘင်္ဂလားဒေ့ရှ် ဒုက္ခသည်စခန်းတွင်း ပဋိပက္ခ၌ လူရာချီ ဒါဏ်ရာရရှိ၊ အုပ်စုဖွဲ့လျှက် လူသေဆုံးသည်အထိ ရက်ရှည်တိုက်ခိုက်မှုများနောက်ကွယ်တွင် ARSA ရှိနေဟု ဆို။ စခန်းတွင်း တရားဥပဒေစိုးမိုးရေးအတွက် တပ်ဖွဲ့ဝင်များကို ဘင်္ဂလားဒေ့ရှ်အစိုးရစေလွှတ်

လွန်ခဲ့သည့် ရက်သတ္တပတ်မှစတင်၍ ကော့ခ်ဘဇားခရိုင် အူခီယာမြို့နယ်ရှိ ကူတူပါလောင်ဒုက္ခသည် စခန်းအတွင်း၌ ဒုက္ခသည်ဘင်္ဂါလီ ( မူရင်း ရိုဟင်ဂျာဟု ဖော်ပြ ) အုပ်စုနှစ်စုအကြားတွင် ပဋိပက္ခများဆက်တိုက်ဖြစ်ပွားခဲ့ရှိသည်။ ဗုဒ္ဓဟူးနေ့တစ်နေ့လုံး ပြတ်တောင်းပြတ်တောင်းဖြစ်ပွားခဲ့သော ပစ်ခတ်တိုက်ခိုက်မှု များ၌ အနည်းဆုံး လူ ၅၀ ခန့် ဒါဏ်ရာရရှိသည်ဟု ဘင်္ဂလားအခြေစိုက် Dhaka Tribune က ယနေ့ရေးသားသည်။ 

  
အဆိုပါ ဒုက္ခသည်စခန်းများတွင် မြန်မာနိုင်ငံတွင် တပ်မတော်၏ ဖြိုခွင်းခြင်းကြောင့် ထွက်ပြေးလာရသည့် ဒုက္ခသည်ဘင်္ဂါလီ ၁-သန်းနီးပါးတို့က ၃-နှစ်ကျော် ခိုလှုံလျှက်ရှိသည်။ မူးယစ်ဆေးဝါးနှင့် ပတ်သက်၍ ပြိုင်ဖက်ဒုက္ခသည် ဂိုဏ်းနှစ်ခုအကြား ပဋိပက္ခများဖြစ်ပွားလျှက်ရှိရာ ရက်ဆက်ကြာမြင့်သည့် တိုက်ခိုက်မှုများ၌ လူ ၇-ဦး သေဆုံးသည်။ ကမ္ဘာ့အကြီးဆုံး ဒုက္ခသည်စခန်းတစ်ခုအတွင်း တိုက်ခိုက်မှုများ အမြန်ဆုံးရပ်တန့်ရေးပတွက် ဘင်္ဂလားဒေ့ရှ်အစိုးရက ( လုံခြုံရေး ) တပ်ဖွဲ့ဝင်များ တိုးမြှင့်စေလွှတ်ခဲ့ကြောင်း AFP သတင်းအရ သိရှိရသည်။ 

  
နယ်စပ်ဖြတ်ကျော်၍ မက်သာအမ်ဖီတမင်း စိတ်ကြွဆေးကုန်ကူးခြင်းမှာ အမြတ်အစွန်းများသော အလုပ်တစ်ခုဖြစ်သည်။ မြန်မာနိုင်ငံမှ လာရောက်သည့် ဒုက္ခသည် လက်နက်ကိုင်အဖွဲ့ ၂-ဖွဲ့သည် အဆိုပါလုပ်ငန်းကို ထိန်း ချုပ်ရန် လူအများအပြား စုပြုံပြွတ်သိပ် နေထိုင် လျှက်ရှိသည့် ဒုက္ခသည်စခန်းအတွင်း၌ လူထိခိုက် သေဆုံးရသည်အထိ ဆိုးရွားလှသော စစ်ပွဲကို ဆင်နွှဲနေကြသည်။ 


လွန်ခဲ့သော ၆-ရက်အတွင်း သေဆုံးခဲ့သူ ၇-ဦးတွင် အမျိုးသမီး ၁-ဦး ပါဝင်ပြီး အခြားသူများလည်း ဒဏ်ရာရရှိခဲ့ကြောင်း အရာရှိတစ်ဦးက ပြောဆိုသည်။ 

  
အင်္ဂါနေ့ညတွင် လမ်ဘာစီယာဒုက္ခသည်စခန်း၌ လူ ၄-ဦး သေဆုံးခဲ့ရာ ၃-ဦးမှာ သေနတ်ဖြင့် ပစ်သတ်ခံရခြင်းဖြစ်ပြီး ကျန် ၁-ဦးတွင် ဒါးဖြင့် ထိုးသွင်းခံရသည့် ဒါဏ်ရာများ တွေ့ရှိရသည်ဆို၏။ 


လွန်ခဲ့သည့် သောကြာ ( အောက်တိုဘာ ၂ ရက်နေ့၌ ) တိုက်ခိုက်မှုများ ဖြစ်ပွားသဖြင့် ရာနှင့်ချီသော စစ်တပ်နှင့် လက်နက်ကိုင်ရဲတပ်ဖွဲ့ကို ဖြန့်ချထားခဲ့ပြီး အင်္ဂါနေ့ပဋိပက္ခများ၌ တပ်ဖွဲ့ဝင် အင်အား ထပ်မံတိုးမြှင့်ခဲ့ရကြောင်း၊ ယခုအခါ တည်ငြိမ်အေးချမ်းမှုကို ထိန်းသိမ်းနိုင်ပြီဖြစ်ကြောင်း ကော့ခ်ဘဇားရဲတပ်ဖွဲ့ အုပ်ချုပ်ရေးမှူး မိုဟာမက်ရာကွတ်အစ္စလာမ်က ရှင်းပြသည်။ 

ကုလသမဂ္ဂက လူမျိုးသုဉ်းပြုမှုအဖြစ် ရည်ညွှန်းပြောဆိုသည့် ဖြိုခွင်းမှုသည် မြန်မာနယ်ခြားစောင့်လုံခြုံရေးစခန်းများကို ( Arakan Rohingya Salvation Army ) ARSA စစ်သွေးကြွတို့က တိုက်ခိုက်မှုများအပြီး နောက်ဆက်တွဲဖြစ်သည်။ 


ARSA သည် ယခုအခါ ကူတူပါလောင်စခန်းအား အခြေပြု၍ မူးယစ်ဆေးဝါးမှောင်ခိုတင်သွင်းသည်ဟု နာမည်ကြီးသည့် “ မူနာဂိုဏ်း “ နှင့် တိုက်ခိုက်မှုပဋိပက္ခတွင် ပါဝင်ပတ်သက်နေကြောင်း၊ ဒုက္ခသည်ဘင်္ဂါလီခေါင်းဆောင်များက ပြောဆိုသည်။ အခြားခေါင်းဆောင်တစ်ဦးကမူ တိုက်ခိုက်မှုများအတွင်း ၎င်း၏အစ်ကိုနှင့် မိသားစုဝင် ၃-ဦး တို့ သေဆုံးခဲ့ကြောင်း ၊ လူ ၄-ဦး အသတ်ခံရမှုတွင် ARSA ၌ တာဝန်ရှိသည်ဟု ပြောဆိုသည်။ 


ကူတူပါလောင်အခြေစိုက် ဒုက္ခသည်ဘင်္ဂါလီအရေးတက်ကြွလှုပ်ရှားသူတစ်ဦးက ရှင်းပြရာ၌ ARSA သည် စခန်းအားလုံးကို အပြည့်အ၀ ထိန်းချုပ်ရန်ဆန္ဒရှိနေပြီး ရက်သတ္တပတ်ကျော် ဖြစ်ပွားသည့် လူသတ်မှုများ နောက်ကွယ်တွင် ARSA ရှိနေသည်ဟု ပြောဆိုကြောင်း သတင်း၌ ဆက်လက်ဖော်ပြသည်။ 

  
(( မြန်မာနှင့် ဘင်္ဂလားဒေ့ရှ်နယ်ခြားဧရိယာတစ်ဝှိုက် နိုင်ငံမဲ့ဖြစ်လျှက်ရှိသူ ဒုက္ခသည်များ ရှိနေသည်မှာ ဆယ်စုနှစ်ချီ ကြာမြင့်ခဲ့ပြီဖြစ်သည်။ ၎င်းတို့အား ရည်ညွှန်းပြောဆိုသည့် လူမျိုးတစ်မျိုးအမည်မှာ နှစ်နိုင်ငံစလုံးက တရားဝင် အသိအမှတ်ပြုခြင်းမရှိချေ။ နှစ်ကာလကြာရှည်သော မရေရာမှုများ၌ ၎င်းတို့လူဦးရေမှာလည်း တစ်ဖြည်းဖြည်း တိုးမြင့်လာသည်။ စာမတတ်သူအများစုဖြစ်သော မိန်းမ-ကလေး-သက်ကြီးရွယ်တို့ ပါဝင်သည့် အဆိုပါ လူစုလူဝေးကြီးသည် ဒေသတွင်း၌ လူကုန်ကူး- လိင်အမြတ်ထုတ်- ခေတ်သစ်ကျွန်ပြူခြင်းခံနေရပြီး နှစ်နိုင်ငံစလုံးနှင့် ကမ္ဘာ့လူသားအားလုံးသာမက ၎င်းတို့အား လူညွန့်တုံးစေမည့် မူးယစ်ဆေးဝါးကုန်ကူးခြင်းတို့၌ ဝမ်းနည်းဖွယ် သားကောင်ဖြစ်လျှက်ရှိသည်။ 

  
၎င်းတို့၏ လူ့ဘဝရပ်တည်မှုမှာ ကိုယ်တိုင်နှင့် လူ့အသိုင်းအဝိုင်းအတွက် အလဟဿ ဖြစ်လျှက်ရှိပြီး ၎င်းတို့အား ဗန်းပြ လုပ်စားနေသည့် နိုင်ငံတကာအဖွဲ့အစည်းအချို့ ကောင်းစားရေးသာဖြစ်နေကြောင်း ဘင်္ဂလားဒေ့ရှ်သတင်းစာများ ရေးသားချက်ကို ကျွန်တော်ဘာသာပြန်ဆို တင်ပြခဲ့ပြီးပါပြီ။ 

  
၎င်းတို့တွင် မြန်မာနိုင်ငံ ၁၉၈၂-ခုနှစ် ဥပဒေအရပင်လျှင် နိုင်ငံသားဖြစ်ခွင့်ရှိသူ သိန်းချီရှိနိုင်သည်။ ဘင်္ဂါလီလူမျိုး ဆိုသည်မှာ နိမ့်ကျသည်ဟု ပြောဆိုရေးသားချက်မျိုး ကျွန်တော် တစ်ခါမျှ မဖတ်ဖူး မကြားဖူးပါ။ ကျဉ်းမြောင်းသော လူမျိုးရေး ဘာသာရေးအမြင်များ မပါ၊ နိုင်ငံရေးရည်ရွယ်ချက်ဖြင့် အမြတ်ထုတ်လိုခြင်းမှ မရှိပဲ ကုလသမဂ္ဂ ကြားခံထား၍ မြန်မာ-ဘင်္ဂလားဒေ့ရှ်နှစ်နိုင်ငံ သဘောထူစာချုပ်အတိုင်း အမြန်ဆုံးအကောင်အထည် ဖော်သင့်ပါသည်။ 

ထိုသို့မဟုတ်လျှင် ကာယကံရှင်များမှာ နေရေး စားရေးအခက်အခဲကြောင့် ဒုစရိုက်နွံအတွင်း ကြာလေ တွန်းပို့ခံရလေ ဖြစ်ဖွယ်ရှိပြီး ဆက်စပ်နှစ်နိုင်ငံလုံး၌လည်း သားစဉ်မြေးဆက် ဒုတ်ထမ်း ဒါးထမ်း ဖြေရှင်းရမည့် ကိန်းဆိုက်ရန်သာ ရှိတော့သည်။ ။ သတင်းဘာသာပြန်သူ )) 

#ဘင်္ဂလားဒ့ရှ်ဒုက္ခသည်စခန်း_တိုက်ခိုက်မှုပဋိပက္ခ 

((( Dhaka Tribune., October 7th, 2020,” Hundreds injured in clashes between two factions in Rohingya camp. By: Abdul Aziz, Cox’s Bazar “ ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။ အကြောင်းအရာတူများကို စုစည်းဖော်ပြရာတွင် အချက်အလက်များမှာ ပေးထားပါ Links များအတိုင်းဖြစ်သည်။ ))) 

https://www.dhakatribune.com/bangladesh/rohingya-crisis/2020/10/07/hundreds-injured-in-clashes-between-two-factions-in-rohingya-camp 


https://www.dhakatribune.com/bangladesh/2020/10/07/govt-sends-troops-to-halt-rohingya-refugee-drug-fighting 


https://www.dhakatribune.com/bangladesh/nation/2020/10/07/tensions-high-in-rohingya-camps-as-casualties-mount-from-internal-clashes 

https://www.dhakatribune.com/bangladesh/nation/2020/10/06/four-killed-in-clashes-in-cox-s-bazar-rohingya-camp 

0

Leave a Reply

Your email address will not be published.