ဘီရွတ်အဓိကရုန်း ရဲတပ်ဖွဲ့ဝင် ၁-ဦးသေဆုံး၍ လူ ၂၄၀ နီးပါး ဒါဏ်ရာရရှိ။ပေါက်ကွဲမှု ကြီးကြောင့် လက်ဘနွန်ပြည်သူတို့၏ ကြောက်ရွံ့စိုးရိမ်စိတ် ဒေါသအဖြစ်သို့ ပွင့်ထွက်။ ပြည်တွင်းစစ်ပြီးဆုံးသော်လည်း ဒေသန္တရစစ်ဘုရင်ဟောင်းများနှင့် ထွန်းကားလေ့ရှိသည့် sectarian democracy ခေါ် ဂိုဏ်းဂဏစွဲ ဒီမိုကရေစီဝါဒ

လက်ဘနွန်နိုင်ငံ ဘီရွတ်မြို့တွင် ယခုရက်သတ္တပတ်စောစောပိုင်း၌ ကြောက်မက်ဖွယ်ပေါက်ကွဲမှုကြီး ဖြစ်ပွားခဲ့ပြီးနောက် အစိုးရနှုတ်ထွက်ပေးရန် တောင်းဆိုဆန္ဒပြပွဲများ ပေါ်ပေါက်လာခဲ့သည်။ ဆန္ဒပြသူများနှင့် လူစုခွဲရန် ကြိုးစားသူ ရဲတပ်ဖွဲဝင်တို့အကြား ပြင်းထန်သော အဓိကရုန်းများအဖြစ် ပြောင်းလဲခဲ့ပြီး ရဲတပ်ဖွဲ့ဝင် ၁-ဦး သေဆုံး၍ နှစ်ဖက်စလုံးမှ အနည်း ဆုံး ၂၃၈-ဦး ဒါဏ်ရာရရှိခဲ့ကြောင်း၊ ဆေးရုံသို့ ပို့ဆောင်ခဲ့ရသူ ၆၃-ဦးရှိခဲ့ပြီးနောက် တည်ငြိမ်အေးချမ်းမှုထိန်းသိမ်းရန် ဘီရွတ်မြို့လယ်ပိုင်း၌ လက်ဘနွန်စစ်တပ်အား ဖြန့်ချထားရသည်ဟု Russia Today က ယနေ့ရေးသားသည်။ 

  
ထောင်နှင့်ချီသည့် ဆန္ဒပြသူများသည် ဘီရွတ်မြို့လယ်ပိုင်း အာဇာနည်ရင်ပြင်တွင် စုဝေးခဲ့ကြပြီး ပါလီမန်အဆောက်အအုံအား ဝင်ရောက်စီးနင်းရန် ကြိုးစားရာမှ ရဲတပ်ဖွဲ့ဝင်များနှင့် ပဋိပက္ခဖြစ်ပွားခဲ့သည်။ ရဲတပ်ဖွဲ့က မျက်ရည်ယိုဗုံးများကို အသုံးပြု၍ ဆန္ဒပြသူများက ကျောက်ခဲ၊ အုတ်ခဲကျိုးများဖြင့် ပြန်လှန်ပစ်ခတ်ကြသည်ဆို၏။


မီဒီယာများ၏ ဖော်ပြချက်အရဆိုလျှင် အဆောက်အအုံအတွင်း ဆူပူသူများအား လိုက်လံဖမ်းဆီးစဉ် ရဲတပ်ဖွဲ့ဝင် ၁-ဦးမှာ ဓာတ်လှေကားပေါ်မှ မတော်တဆပြုတ်ကျ၍ သေဆုံးသွားခဲ့ကြောင်း၊ တရားဥပဒေစိုးမိုးရေးတာဝန်ရှိသူများသည် လူစုလူဝေးအား နှိမ်နင်းရာတွင် ရာဘာကျည်ဆန်များသာမက ကျည်အစစ်သုံး၍လည်း ပစ်ခတ်ခဲ့ကြောင်း သိရှိရသည်။ လူမှုကွန်ရက်တွင် ပျံ့လွင့်လျှက်ရှိသော အဓိကရုန်းဖြစ်ပွားမှု သတင်းဓါတ်ပုံများ၌ ဒါဏ်ရာပြင်းထန်ပုံရ၍ သွေးထွက်သံယိုဖြစ်ရသူများစွာတို့ကို တွေ့မြင်ကြရသည်။ 


အာဇာနည်ရင်ပြင်တွင် ရုန့်ရင်းဆန်ခတ်ဖြစ်ပွားစဉ် သေနတ်နှင့် ပစ်ခတ်မှုရှိခဲ့ကြောင်း တွေ့မြင်ခဲ့ရသူတစ်ဦးက ပြောဆိုသည်။ လူမှုကွန်ရက်၌လည်း ချေမှုန်းရေး စစ်သုံးရိုင်ဖယ်နှင့် ဒုတ်ရှည်ကိုင်ဆောင်ထားသော စစ်သားများက ဆန္ဒပြသူများအား တွန်းထိုးနေပုံကို ဖော်ပြလျှက်ရှိသည်။ 

  
ဘီရွတ်မြို့တော်တွင် ရုန့်ရင်းဆန်ခတ် အကြမ်းဖက်မှုများ ဆက်လက်ဖြစ်ပွားနေစဉ် လက်ရှိပဋိပက္ခအား ဖြေရှင်းရန်မှာ တစ်ခုတည်းသောနည်းလမ်းသာရှိပြီး ပါလီမန်ရွေးကောက်ပွဲအား စောစီးစွာ ကျင်းပရန် မိမိတောင်းဆိုမည်ဖြစ်ကြောင်း လက်ဘနွန်ဝန်ကြီးချုပ် ဟတ်ဆန်ဒိုင်ဘတ်က ပြောဆိုသည်။ 


ယခုရက်သတ္တပတ်တွင် ဘီရွတ်ဆိပ်ကမ်း၌ သိုလှောင်ထားသည့် အမိုးနီးယားနိုက်ထရိတ်များ ပြင်းထန်စွာ လောင်ကြွမ်းပေါက်ကွဲမှုခဲ့သဖြင့် လူ ၁၅၀ ကျော်သေဆုံးပြီး ထောင်ပေါင်းများစွာ ဒါဏ်ရာရရှိခဲ့ရသည်။ အဆောက်အအုံများ ပျက်စီးခြင်းကြောင့် လူသိန်းချီကာ အိုးမဲ့ အိမ်မဲ့ ဖြစ်ကြရသည်။ 


ပေါက်ကွဲမှုဖြစ်ရခြင်းနှင့် ပတ်သက်၍ စုံစမ်းစစ်ဆေးမှုများ စတင်လျှက်ရှိသည်။ သို့သော် ပြင်းထန်စွာ ပေါက်ကွဲစေတတ်သည့် ဓါတုပစ္စည်းများအား သိုလှောင်ရာတွင် လုံခြုံရေးအစီအမံများ မရှိ၊ ကြီးကြပ်ထိန်းသိမ်းခြင်းလည်း မပြုလုပ်ခဲ့ကြသဖြင့် အစိုးရ၌ တာဝန်ရှိကြောင်း ဆန္ဒပြသူများက အပြစ်ပုံချလျှက်ရှိသည်။ 


ပေါက်ကွဲမှုသည် မြို့တော်၏ အစိတ်အပိုင်းအများစုကို ချေမွှပစ်ခဲ့ပြီး စီးပွားရေးလုပ်ငန်းများ၊ ဆေးရုံများနှင့် အခြားအခြေခံအဆောက်အအုံများကို ပျက်စီးစေခဲ့သည်။ ထို့အပြင် နေအိမ်များ ပျက်စီးမှုကြောင့် လူပေါင်း ၂၀၀,၀၀၀ ကျော် အိုးမဲ့အိမ်မဲ့ ဖြစ်ခဲ့ရသည်။ ဒေသခံများ၊ စေတနာ့ဝန်ထမ်းများနှင့် အရေးပေါ်ဝန်ဆောင်မှုလုပ်သားတို့က အပျက်အစီးပုံကြီးများအောက်မှ အသက်ရှင်လျှက်ရှိသူများကို ဆက်လက်ရှာဖွေနေကြသည်။ နေစရာ အိုးအိမ်၊ စားစရာနှင့် သောက်သုံးရန် ရေပင်ပြတ်လပ်လျှက်ရှိခြင်းကြောင့် ကန့်ကွက်ဆန္ဒပြသည့်နေရာ၌ လူထောင်ပေါင်းများစွာတို့ စုဝေးခဲ့ကြသည်။ 


(( လက်ဘနွန်၏ ၁၅-နှစ်ကြာ ပြည်တွင်းစစ်မှာ ၁၉၉၀-ခုနှစ်တွင် ပြီးဆုံးသွားသည်။ ဒီမိုကရေစီနိုင်ငံ ဖြစ်ခဲ့သော်လည်း အခြားသော ပြည်တွင်းစစ်မီးတောက်လောင်ခဲ့ဖူးသည့် နိုင်ငံများနည်းတူ လက်ဘနွန်တွင် ယခင်က စစ်ဘုရင်ဟောင်းများမှာ ပါဝါပွဲစားများဖြစ်လာကြသည်။ အာဏာ- မြေတို့ကို ခွဲဝေယူကြပြီး sectarian democracy ခေါ် ဂိုဏ်းဂဏစွဲ ဒီမိုကရေစီဝါဒ သာလျှင်ဖြစ်ပေါ်လာသည်။ တရားဝင်ကိုးကွယ်ရာ ဘာသာ ၁၈-မျိုး ရှိနေသည့် နိုင်ငံသည် နာတာရှည် နိုင်ငံရေးအကြပ်အတည်းနှင့် ကျယ်ပြန်သောအကျင့်ပျက်ခြစားမှုများကြောင့် နိုင်ငံ့စီးပွားရေးအခြေခံအဆောက်အအုံတို့ ချိနဲ့သွားသည်။ အစိုးရ၏ ကြွေးမြီစုစုပေါင်းသည် ပြည်တွင်း အသားတင်ကုန်ထုတ်လုပ်မှု၏ ၁၆၀ ရာခိုင်နှုန်းအထိ ထမ်းပိုးထားရသည်။ ငွေကြေး တန်ဖိုး ၈၀% ဆုံးရှုံးခဲ့ပြီး ကုန်ဈေးနှုန်းနှင့် အလုပ်လက်မဲ့နှုန်းတို့မှာ မိုးထိမြင့်နေသည်။ ထိုစဉ်အတွင်း ကိုရိုနာဗိုင်းရပ်စ်ရောဂါ ပျံ့နှံ့မှုကို နှေးကွေးစေရန်ရည်ရွယ်သောပိတ်ဆို့မှုများက တိုင်းပြည်၏ စီးပွားရေးကို ပိုမိုထိခိုက်စေခဲ့သည်။ 

  
ကျွန်တော်များ၏ ကျောင်းပညာရေးသည် လူ့သမိုင်းတွင် တွေ့ရှိခဲ့ဖူးသမျှကို သင်ကြားပေးသည်။ စဉ်းစားချင့်ချိန် နိုင်စွမ်းနှင့် သိလိုတတ်လိုစိတ်ကို မြေတောင်မြှောက်ပေးပြီး ဆက်လက်လေ့လာရန် ရှာဖွေနည်းကိုပါ နည်းလမ်း ပြသပေးသည်။ 


သို့သော် လူတစ်ယောက် မသေမချင်းဆည်းပူးနေရမည့် အချက်အလက်များအားလုံးကို မည်သည့်ကျောင်းတော်ကမှ သင်ကြားပေးနိုင်ခြင်း မရှိပါ။ နေ့စဉ် ပတ်ဝန်းကျင်တွင် ဖြစ်ပျက်နေသမျှတို့ကို ကျွန်တော်များ သိမှတ်ရန် တင်ပြပေးလျှက်ရှိသူတို့မှာ သတင်းမီဒီယာများသာလျှင်ဖြစ်ပါသည်။ 


ထို့ကြောင့်လည်း လူ့အဖွဲ့အစည်းကြီး ထူထောင်တည်တန့်စေရာတွင် အုပ်ချုပ်ရေး၊ ဥပဒေပြုရေး၊ တရားစီရင်ရေးတို့ကဲ့သို့ အရေးပါလှသဖြင့် “ စတုတ္ထမဏ္ဍိုင် “ အဖြစ် လေးစားစွာ နေရာပေးကြခြင်းဖြစ်သည်။ 

ကျွန်တော် တစ်ဦးတည်းအမြင်တွင် အကျင့်ပျက်ခြစားမှုသည် နိုင်ငံတစ်နိုင်ငံ၏ နိုင်ငံရေး-စီးပွားရေးဖွံ့ဖြိုး တိုးတက်မှု၏ ပြဒါးတိုင်ဖြစ်သည်ဟု ယူဆသည်။ အကျင့်ခြစားမှု နည်းလေလေ ပြည်တွင်းနိုင်ငံရေးတည်ငြိမ်၍ စီးပွားရေးတိုးတက်လေလေဖြစ်သည်။ ဥပမာ တရုတ်၊ အိန္ဒိယနှင့် စင်္ကာပူဖြစ်သည်။ သတင်းမီဒီယာတို့က ဖော်ထုတ်ရေးသားကြလျှင် အကျင့်ပျက်ခြစားမှု- လွဲမှားသော စီမံခန့်ခွဲမှု့ နည်းပါးသွားလေ ဖြစ်နိုင်သည်။ 


သို့သော် သတင်းလွတ်လပ်ခွင့်တွင်မူ နိုင်ငံ ၁၈၀ တွင် တရုတ် ( ၁၇၇ ) သည်အဆိုးဆုံးဖြစ်၍ မတိမ်းမယိမ်းမှာ လော ( ၁၇၂ ) ဖြစ်သည်။ စင်္ကာပူ( ၁၅၈ ) ထက်လည်း အပုံကြီး ဆိုးရွားပြီး ထို ၃-နိုင်ငံလုံးပင် ၂၀၂၀-ခုနှစ် သတင်းမီဒီယာလွတ်လပ်ခွင့် ကမ္ဘာ့အဆိုးရွားဆုံး အနက်ရောင် စာရင်းဝင်များ ဖြစ်သည်။ မြန်မာနှင့် ကျန်အိမ်နီးချင်းနိုင်ငံများအားလုံးသည် အနီရောင်စာရင်းဝင်များဖြစ်ကြသည်။ မြန်မာသည် နိုင်ငံ ၁၈၀ တွင် ယခင် နှစ်ထက် ၁-မှတ်လျှော့ကာ ( ၁၃၉ )၊ ထိုင်း ( ၁၄၀ )၊ အိန္ဒိယ ( ၁၄၂ ) နှင့် ဘင်္ဂလားဒက်ရှ် ( ၁၅၁ ) ဖြစ်သည်။

  
သာမန်အားဖြင့် သတင်းလွတ်လပ်ခွင့်ရလေ အကျင့်ပျက်ခြစားမှုနည်းလေ ထင်ရသော်လည်း ထိုသို့မဟုတ်ကြောင်း လက်တွေ့သိမြင်နိုင်သည်။ ထိုအချက်မှာ သက်ဆိုင်ရာ သတင်းမီဒီယာတို့၏ ရပ်တည်ချက်အား ဝေဖန်ဆန်းစစ်ရန် ဖြစ်ပေါ်လာစေသည်။ သတင်းမီဒီယာသည် ပြည်သူလူထုမှားနေလျှင်ပင် မှားကြောင်း ပြောရဲရမည်ဟု ဆရာကြီး လူထု(ဦး)စိန်ဝင်းက ဆိုပါသည်။ 


တည့်တည့်ပြောရလျှင် လွဲမှားသည့် စီမံခန့်ခွဲမှုနှင့် အကျင့်ပျက်ခြစားမှုကို ဖော်ထုတ်ရန် တာဝန်ရှိသည့် သတင်းမီဒီယာကိုယ်တိုင်က လွဲမှားစွာ ရပ်တည်လျှက် ဆန္ဒာ၊ ဘယာ၊ ဒေါသ၊ မောဟဂတိတည်းဟူသော အဂတိ ( ၄) ပါးတွင် တစ်ခုခု ငြိစွန်းနေ၍ဖြစ်နိုင်သည်။ ။ သတင်းဘာသာပြန်သူ )) 

  
#ဘီရွတ်အဓိကရုန်း #လက်ဘနွန်ပြည်သူတို့၏ကြောက်ရွံ့စိုးရိမ်စိတ်_ဒေါသအဖြစ်သို့_ပွင့်ထွက် 

((( Russia Today., 8 Aug, 2020,” Almost 240 people injured, 1 officer killed in Beirut protests amid clashes, reports of fire & police shooting.” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။ ))) 


https://www.rt.com/news/497476-injured-clashes-lebanon-beirut/ 
https://www.ft.com/content/7b3933c3-8220-453f-a151-ba0b4fb85307 
https://www.rt.com/news/497486-beirut-protests-ministry-lebanon/ 
https://www.rt.com/news/497469-beirut-police-tear-gas-protest-lebanon/ 
https://rsf.org/en/ranking_table 
https://tradingeconomics.com/country-list/corruption-rank 

0

Leave a Reply

Your email address will not be published.