လုံခြုံရေးအခြေအနေအရ နယူးယော့ခ်တိုင်းမ်းစ် သတင်းမီဒီယာ၏ ဟောင်ကောင်ရုံးခွဲ တစ်စိတ်တစ်ပိုင်းကို တောင်ကိုရီးယားသို့ ရွှေ့ပြောင်းမည်။ တရုတ်- အမေရိကန်နှစ်ဘက်စလုံးမှ သတင်းမီဒီယာသမားတို့အတွက် အကန့်အသတ်ဖြစ်လာနေ။ သတင်းမီဒီယာလွတ်လပ်ခွင့်နှင့် အမျိုးသားလုံခြုံရေး

အနောက်မီဒီယာကြီးတစ်ခုဖြစ်သော နယူးယော့ခ်တိုင်းမ်းစ်သတင်းစာ၏ ဟောင်ကောင်ရုံးခွဲတစ်စိတ်တစ်ပိုင်းကို တောင်ကိုရီးယားနိုင်ငံသို့ ရွှေ့ပြောင်းရန်စီစဉ်လျှက်ရှိရာ တရုတ်ပြည်မကြီးအစိုးရက လုံခြုံရေးဥပဒေသစ်ပြဋ္ဌာန်းခြင်း ခါးသီးမှုများမှာ ရက်သတ္တ ၂-ပတ်အကြာတွင် ဟောင်ကောင်၌ နက်ရှိုင်းကျယ်ပြန့်လာကြောင်း နောက်ဆုံးလက္ခဏာဖြစ်သည်ဟု Reuters ၏ သတင်းကို Dhaka Tribune က ယနေ့ ရေးသားသည်။

အလုပ်လုပ်ခွင့် ပါမစ်ရရှိရန် အခက်အခဲဖြစ်လာခြင်းကြောင့် ပထဝီဒေသအလိုက် ကွဲပြားသောအမြင်များဖြင့် တည်းဖြတ်ပေးနေသည့် ဒစ်ဂျစ်တယ်အဖွဲ့ကို လာမည့်နှစ်တွင် တောင်ကိုရီးယားနိုင်ငံ ဆိုးလ်မြို့သို့ ပြောင်းရွှေ့မည်ဖြစ်ကြောင်း၊ ၎င်းမှာ ဝန်ထမ်းအင်အား၏ သုံးပုံတစ်ပုံရှိကြောင်း နယူးယော့ခ်တိုင်းမ်းစ်က ပြောကြားသည်။

တရုတ်နှင့် အမေရိကန်တို့အကြား ဖြစ်ပွားလျှက်ရှိသော ပဋိပက္ခအရှိန်အဟုန်သည် နှစ်ဘက်စလုံးတွင် အလုပ်လုပ်ကိုင်လျှက်ရှိသော သတင်းမီဒီယာသမားများအတွက် ထိခိုက်ဖွယ်ဖြစ်လာသည်။ သတင်းမီဒီယာသမားများအနေဖြင့် တရုတ်ပြည်မကြီးနှင့် အာရှသတင်းမီဒီယာအချက်အချာကျရာ ဟောင်ကောင်တွင်ပါ အလုပ်လုပ်ခွင့်မရှိတော့ကြောင်း ယခုနှစ်တွင် ရှီကျင့်ဖျင်အစိုးရက ပြောဆိုထားသည်။

ဟောင်ကောင်တွင် Wall Street Journal, the Financial Times နှင့် Agence France-Presse ( AFP ) စသည့် နိုင်ငံတကာသတင်းမီဒီယာတို့၏ အာရှဆိုင်ရာရုံးချုပ်တို့လည်း တည်ရှိနေသည်။ Reuters ကမူ ဟောင်ကောင်ကို တရုတ်ပြည်မကြီးသို့ ဗြိတိသျှတို့က လွှဲပြောင်းပေးသည့် ၁၉၉၇-ခုနှစ်တွင် ၎င်း၏ အာရှရုံးချုပ်ကို စင်္ကာပူသို့ ပြောင်းရွှေ့သွားပြီးဖြစ်သည်။


ဟောင်ကောင်ကို လွှဲပြောင်းလက်ခံစဉ် တရုတ်အစိုးရက ဟောင်ကောင်တွင် ကိုယ်ပိုင်အုပ်ချုပ်ခွင့်ရှိကြောင်း ကတိပေးခဲ့သည်။ အစဉ်အလာအတိုင်း သတင်းမီဒီယာများ လွတ်လပ်စွာ သတင်းရယူပိုင်ခွင့်ရှိပြီး နိုင်ငံတကာသတင်း မီဒီယာများ၏ အာရှဆိုင်ရာရုံးချုပ်များကို ရပ်တည်ခွင့်ပေးခဲ့သည်။

လွန်ခဲ့သည့် ရက်ပိုင်း တရုတ်နိုင်ငံက အသစ်ပြဋ္ဌာန်းခဲ့သည့် ဥပဒေသစ်တွင် တရုတ်ပြည်မကြီးမှ ခွဲထွက်ခြင်း၊ ဖြိုခွဲခြင်း၊ သိမ်းသွင်းခြင်း၊ အကြမ်းဖက်ခြင်း၊ နိုင်ငံခြားတပ်ဖွဲ့များနှင့် ပူးပေါင်းခြင်းတို့မှာ တစ်သက်တစ်ကျွန်း ပြစ်ဒါဏ်ထိုက်သင့်သော ကြီးလေးသည့် အမှုကြီးများဖြစ်နေသည်။ ဥပဒေသစ်အရ လွတ်လပ်စွာပြော ဆိုခွင့်နှင့်ပတ်သက်၍ သတင်းမီဒီယာအတွက် စိုးရိမ်ပူပန်မှုများကိုဖြစ်စေသည်။

ဟောင်ကောင် အုပ်ချုပ်ရေးမှူး ကာရီလမ်ကမူ ဟောင်ကောင်တွင် သတင်းလွတ်လပ်ခွင့် တည်ရှိဆဲဖြစ်ကြောင်း၊ အမျိုးသားလုံခြုံရေးမှာ အထူးအရေးကြီးကြောင်း သတင်းမီဒီယာတို့အနေဖြင့် လုံခြုံရေးဥပဒေကို ချိုးဖောက်ရာ မရောက်လျှင် လွတ်လပ်စွာ သတင်းရယူနိုင်ကြောင်း ပြောကြားသည်။

ယခုနှစ်တွင် အမေရိကန်အစိုးရသည် တရုတ်နိုင်ငံပိုင် မီဒီယာအဖွဲ့အစည်း ၅-ခုကို နိုင်ငံခြားသံရုံးများသဖွယ် စတင်ဆက်ဆံခဲ့သည်၊ ၎င်းမတိုင်မီ တရုတ် အစိုးရပိုင်မီဒီယာများအတွက် သတင်းမီဒီယာသမား ၁၆၀ – ဦး ခွင့်ပြုထားရာမှ ၁၀၀ သို့ လျှော့ချခဲ့သည်။

တရုတ်ကလည်း လက်တုံ့ပြန်သည့်အနေဖြင့် နယူးယောက်တိုမ်း၊ ဝေါလ်စထရိဂျာနယ်နှင့် ဝါရှင်တန်ပို့စ်တို့မှ ၂၀၂၀ အကုန်တွင် သက်တမ်းကုန်ဆုံးမည့် အမေရိကန်သတင်းထောက်များအား အသိအမှတ်ပြုခြင်းမှ ပြန်လည်ရုပ်သိမ်းခဲ့သည်။


ဝေါလ်စထရိဂျာနယ်က “ အာရှ၏ အမှန်တကယ်ဖျားနာနေသူကြီး “ ဟု တရုတ်နိုင်ငံနှင့် ပတ်သက်၍ သတင်းသုံးသပ်ချက် ရေးသားပြီးနောက် အမေရိကန်သတင်းထောက် ၂-ဦး သြစတြေးလျသတင်းထောက် ၁-ဦးတို့ကို တရုတ်က နှင်ထုတ်ပစ်ခဲ့သည်။

(( ကျွန်တော့်အနေဖြင့် အာရှတိုက်သားနှင့် အနောက်နိုင်ငံသားများသည် လူချင်းတူသော်လည်း အတွေးအမြင်များ တစ်ထပ်တည်း မတူဟု ထင်မြင်ပါသည်။ ယဉ်ကျေးမှု၊ ဓလေ့ထုံးတမ်း၊ သမိုင်းကြောင်း နောက်ခံ မတူညီကြ၍ ဖြစ်နိုင်ကြောင်း ဉာဏ်မီပါသည်။


အနောက်နှင့် အရှေ့အလယ်ပိုင်းသားတို့ မတူကွဲပြားသည့် အမြင်အတွေးများမှာ စတင်အသိသာဆုံး ဖြစ်သည်။ တစ်ဘက်၏ သွားလာ- ပြုမူ-ပြောဆိုပုံနှင့် ဓလေ့ထုံးတမ်းမှာ ကျန်တစ်ဘက်အတွက် အမြင်ကပ်စရာချည့်များ ဖြစ်နေသည်။

အာရှ၏ ဓလေ့ထုံးတမ်း၊ ယဉ်ကျေးမှုအများစုမှာ တရုတ်-အိန္ဒိယရှေးဟောင်းယဉ်ကျေးမှုသြဇာလွှမ်းမိုးသည်။ လီကွမ်ယူ သက်ရှိထင်ရှားချိန်တွင် “ အာရှစံနှုန်း ဒီမိုကရေစီ “ ဆိုသည်မှာ အတော် ကျယ်လောင်သည်။

ကမ္ဘာသည် ရွာဖြစ်သွားသောအခါ ထိုအမြင်မတူညီမှုများမှာ အဖုအထစ်သဖွယ် ဖြစ်လာသည်။

အနောက်၏ လစ်ဘရယ်ယဉ်ကျေးမှုဗဟုဝါဒဆိုသည်မှာ “ ဖော်ရှိုး “ မျှသာ ဖြစ်လေသည်။ အမှန်တကယ်သာ ကျင့်သုံးခဲ့လျှင် အမေရိကန်နှင့် ဥရောပတွင် လောလာဆယ် Black Lives Matter #BLM ကန့်ကွက်ဆန္ဒပြပွဲ များ ဖြစ်ပွားလာစရာ အကြောင်း မရှိချေ။      ။ သတင်းဘာသာပြန်သူ ))

((( Dhaka Tribune., July 15, 2020, “New York Times to move part of Hong Kong office to Seoul in wake of security law.” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။ )))

#ဟောင်ကောင်_နယူးယောက်တိုင်းမ်_တောင်ကိုရီးယားသို့ရွှေ့ပြောင်းမည်

https://www.dhakatribune.com/world/east-asia/2020/07/15/new-york-times-to-move-part-of-hong-kong-office-to-seoul-in-wake-of-security-law

1+

Leave a Reply

Your email address will not be published.