အာသံပြည်နယ်၌ ကွယ်လွန်ခဲ့သော နိုင်ငံခြားသားအဖြစ်ကြေညာခံထားရသူ ရုပ်အလောင်းကို အိန္ဒိယအစိုးရ ပြန်ပို့။ အိန္ဒိယနိုင်ငံသားအဖြစ် ကြေညာခြင်းမရှိလျှင် လက်မခံနိုင်ဟု ဘင်္ဂလားဒက်ရှ်နေ ကျန်ရစ်သူမိသားစု ငြင်းဆို

အာသံပြည်နယ်အတွင်း နိုင်ငံခြားသားအဖြစ်ကြေညာခြင်းခံရပြီး ထိန်းသိမ်းထားစဉ် သေဆုံးသွားသူတစ်ဦး၏ ရုပ်အလောင်းကို အိန္ဒိယအစိုးရက ဘင်္ဂလားဒက်ရှ်သို့ ပြန်ပို့ခဲ့သည်။ သို့သော် အိန္ဒိယအစိုးရက ကွယ်လွန်သူအား အိန္ဒိယနိုင်ငံသားအဖြစ် ကြေညာခြင်းမရှိလျှင် လက်ခံနိုင်မည်မဟုတ်ကြောင်း ဘင်္ဂလားဒက်ရှ်နေ ကျန်ရစ်သူမိသားစုက ငြင်းဆိုသည်ဟု အိန္ဒိယအခြေစိုက် All Indaia က အောက်တိုဘာ ၁၄ ရက်နေ့၌ ရေးသားသည်။ 

အိန္ဒိယ အာသံပြည်နယ် ဆိုနစ်ပူရ်ခရိုင် အလစ်စင်းဂါးရွာနေ အသက် ၆၅-နှစ်အရွယ် ဒူလာချန်ဒရာပေါလ်ဆိုသူသည် ဂွာရတ်သီကောလိပ်ဆေးရုံတွင် ကုသမှုခံယူနေစဉ် ဖျားနာရောဂါဖြင့် လွန်ခဲ့သည့် တနင်္ဂနွေနေ့၌ သေဆုံးခဲ့ခြင်းဖြစ်သည်ဆို၏။

သေဆုံးသူ ပေါလ်သည် နိုင်ငံခြားသားတစ်ဦးဖြစ်ကြောင်း အိန္ဒိယအစိုးရက ကြေညာထားခဲ့ပြီးဖြစ်၍ ၎င်း၏ ရုပ်ကလာပ်ကို ဘင်္ဂလားဒက်ရှ်သို့ ပြန်ပို့ရန်စီစဉ်ခဲ့သည်။ သို့သော် ပေါလ်မှာ နိုင်ငံခြားသားမဟုတ်ပဲ အိန္ဒိယနိုင်ငံသားဖြစ်သည်ဟု ကြေညာပေးမှသာလျှင် ရုပ်အလောင်းအား လက်ခံနိုင်မည်ဖြစ်ကြောင်း ဘင်္ဂလားဒက်ရှ်နေ ကျန်ရစ်သူ မိသားစုက ငြင်းဆိုလျှက်ရှိသည်ဟု သိရှိရသည်။ 

ပေါလ်သည် ကွယ်လွန်ခြင်းမတိုင်မီ တက်ဇာပူရ်အကျဉ်းထောင်နှင့် တွဲဖက်ထားသော ထိန်းသိမ်းရေးစခန်း၌ ခိုးဝင်နိုင်ငံခြားသားအဖြစ် ထိန်းသိမ်းခြင်းခံရသူဖြစ်သည်။ ထိန်းသိမ်းထားစဉ် ကျန်းမာရေးချို့ယွင်းဆိုရွားလာသဖြင့် ဂွာရတ်သီကောလိပ်ဆေးရုံသို့ လွှဲပြောင်းကုသပေးနေစဉ် သေဆုံးခဲ့ခြင်းဖြစ်ကြောင်း အိန္ဒိယအာဏာပိုင်များက ပြောဆိုသည်။ 

၂၀၁၇-ခုနှစ်တွင် စိတ်ကျန်းမာရေး ချိုးယွင်းလျှက်ရှိသူ ပေါလ်အား အိန္ဒိယတရားသူကြီးများက နိုင်ငံခြားသားအဖြစ် ကြေညာခဲ့ခြင်းဖြစ်ကြောင်း၊ အိန္ဒိယအာဏာပိုင်တို့က ပေါလ်နေထိုင်ခဲ့ဖူးသော ရွာနေဆွေမျိုးများအား ပေါလ်သေဆုံးကြောင်းနှင့် အလောင်းအား လက်ခံရန် ပြောဆိုခဲ့ကြောင်း၊ အရှစ်၏ အကြီးဆုံးသားဖြစ်သူ ပေါလ်သည် လွန်ခဲ့သည့် ၁၉၆၀-ခုနှစ်ကပင် အခြားဆွေမျိုးများနှင့်အတူ အိန္ဒိယနိုင်ငံသားအဖြစ် စာရင်းမူကြမ်း၌ ပါဝင်ခဲ့သူဖြစ်ကြောင်း မိသားစုက All India သို့ တယ်လီဖုန်းဖြင့် ပြောဆိုသည်။ 

၁၉၈၅-ခုနှစ်နောက်ပိုင်း ထိန်းသိမ်းရေးစခန်းများ၌ သေဆုံးသူ ၂၅-ဦးရှိခဲ့ရာ အသက် ၈၅-နှစ်အဘိုးအိုတစ်ဦးနှင့် ၄၅-ရက်သား ကလေးတစ်ဦးပါဝင်ကြောင်း အာသံပြည်နယ်အစိုးရ၏ ယမန်နှစ် သတင်းထုတ်ပြန်ချက်၌ ဖော်ပြထားသည်။ 

လွန်ခဲ့သည့် သြဂုတ်လ၌ ခိုးဝင်ရှင်းလင်းရေးအတွက် နိုင်ငံသားအဖြစ်အပြီးသတ်အတည်ပြုခံရသူများ အမည်စာရင်းကို အာသံပြည်နယ်အစိုးရက ထုတ်ပြန်ခဲ့ရာ ( မွတ်စလင်အများစုအပါဝင် ) လူပေါင်း ၁.၉ သန်းကျော်မှာ နိုင်ငံမဲ့အဖြစ်ရောက်ရှိသွားသည်။ သို့သော် အဆိုပါ လူဦးရေပမာဏအတွက် အတိုက်အခံတို့သာမက အာဏာရ BJP ပါတီအတွက်ပါ အကြပ်ရိုက်ခဲ့ရသည်။ နိုင်ငံမဲ့ဖြစ်ရသူများတွင် ဘင်္ဂါလီလူမျိုး ဟိန္ဒူဘာသာဝင်အများအပြားပါဝင်နေမည်ကို BJP ပါတီခေါင်းဆောင်များအတွက် စိုးရိမ်ဖွယ်ဖြစ်ခဲ့ရသည်။ 

နိုင်ငံတော်အမျိုးသားမှတ်ပုံတင် NRC မရရှိသူများအား ခရိုင်အာဏာပိုင်များမှတဆင့် တရားဝင်အကူအညီ ပေးအပ်မည်ဖြစ်ကြောင်း ခိုးဝင်ထိန်းသိမ်းရေးစခန်းတာဝန်ရှိသူများက ပြောဆိုသည်။ 

(( ဗြိတိသျှအုပ်ချုပ်ခံအဖြစ် ရှိနေစဉ် အိန္ဒိယရော ယခုဘင်္ဂလားဒက်ရှ်ပါ တစ်ပေါင်းတည်းဖြစ်သည်။ အရှေ့ပါကစ္စတန်အဖြစ်လွတ်လပ်ရေးရပြီးနောက် ၂၄ အကြာ ၁၉၇၁- ခုနှစ်တွင် အနောက်ပါကစ္စတန်မှ ခွဲထွက်သည့် ဘင်္ဂလားတော်လှန်ရေးဖြစ်ပွားရာ ဘင်္ဂါလီလူမျိုး ၃၀၀,၀၀၀ မှ ၃,၀၀၀,၀၀၀ အကြား ဂျီနိုဆိုက်ခံရကြောင်း မှတ်တမ်းများရှိသည်။ ဘင်္ဂါလီ ၈ သန်းမှ ၁၀ သန်းကြား စစ်ပြေးဒုက္ခသည်ဖြစ်ခဲ့ရာ ယခုဘင်္ဂလားဒက်ရှ် ဝန်ကြီးချုပ် ရှိတ်ဟာစီနာ ကိုယ်တိုင် အိန္ဒိယရောက် စစ်ဘေးရှောင်ဖြစ်ခဲ့ဖူးသည်။ အိန္ဒိယနိုင်ငံအရှေ့ပိုင်းတစ်ခွင်၌ ဘင်္ဂါလီလူမျိုးများ ပြန့်နှံ့နေထိုင်ကြရာ ၁၉၇၁-ခုနှစ်မတိုင်မီ အိန္ဒိယနိုင်ငံအတွင်း တရားဝင်နေထိုင်ခဲ့ကြောင်း အထောက်အထားပြသနိုင်သူဘင်္ဂါလီများကို နိုင်ငံသားအဖြစ် အိန္ဒိယအစိုးရက အသိအမှတ်ပြုသည်။ ထိုကာလနောက်ပိုင်း အိန္ဒိယသို့ တရားမဝင်သွားရောက်သူ မရှိဟု ဘင်္ဂလားဒက်ရှ်အစိုးရက အခိုင်အမာ ပြောဆိုလျှက်ရှိသဖြင့် အာသံပြည်နယ်ရောက် အထောက်အထားမရှိသူ ဘင်္ဂါလီအများစုပါဝင်သည့် လူပေါင်း ၂ သန်းခန့်မှာ “ နိုင်ငံမဲ့ “ အဖြစ် ရောက်ရှိသွားသည်။ ။ သတင်းဘာသာပြန်သူ )) 

((( အောက်တိုဘာ – ၁၇၊ ၂၀၁၉ All India., October 14, 2019 , “Man Declared Foreigner Dies In Assam, Family Refuses To Accept Body.” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။ )) 

https://www.ndtv.com/india-news/man-declared-foreigner-dies-in-assam-family-refuses-to-accept-body-2116629. 


https://www.nytimes.com/2019/09/11/opinion/india-assam-stateless-bengalis-muslim.html 

1+

Leave a Reply

Your email address will not be published.