ကော့ခ်ဘဇားရောက် ဒုက္ခသည်အရေအတွက်မှာ ၈၆၀,၆၉၇ -ဦးရှိဟု ဘင်္ဂလားဒေ့ရှ်အစိုးရကော်မရှင်နာမင်းကြီးပြောဆို။ ၂-နှစ်ခန့်အတွင်း ကလေးပေါင်း ၇၅,၀၀၀ ခန့် မွေးဖွားခဲ့ပြီး ကိန်းဂဏန်းများ ရှေ့နောက်မညီ ဖြစ်ခဲ့၊ ရခိုင်ပြည်နယ်အခြေအနေသည် နိုင်ငံသားဖြစ်ခွင့်ငြင်းပယ်ခံထားရသော ဒုက္ခသည်များအတွက် အန္တရာယ်ရှိနေဆဲဖြစ်ဟု နိုင်ငံတကာ ပြောဆို

                      
ဘင်္ဂလားဒေ့ရ်ှတွင် ခိုလှုံလျှက်သော ဒုက္ခသည်ဘင်္ဂါလီ ( မူရင်း ရိုဟင်ဂျာဟုဖော်ပြ ) တို့၏ ယခုနောက်ဆုံး ခန့်မှန်းဦးရေမှာ တိတိကျကျဆိုရလျှင် ၈၅၀,၀၀၀ ခန့် ဖြစ်သည်။ လွန်ခဲ့သော ၂ နှစ်က ၉၅,၀၀၀ နီးပါးဟု ထုတ်ပြန်ခဲ့သည့် ကိန်းဂဏန်းမှာမူ ကနဦးတွက်ချက်ထားခြင်း မရှိခဲ့ကြောင်း ဘင်္ဂလားဒေ့ရှ်အစိုးရ၏ ဒုက္ခသည်များ၊ အကူအညီပေးရေးနှင့် နေရပ်ပြန်ရေးဆိုင်ရာ ( RRRC ) တွဲဘက်ကော်မရှင်နာမင်းကြီး မိုဟာမက်ရှာမ်ဆူဒူဇာက ပြောကြားသည်ဟု bdnews24 ဒစ်ဂျစ်တယ်မီဒီယာက ( Oct.09, 2020 ) ရေးသားသည်။ 


ဘင်္ဂလားဒေ့ရှ်နိုင်ငံ အရှေ့တောင်ဘက် ကမ်းရိုးတန်းခရိုင်ဖြစ်သော ကော့ခ်ဘဇားတွင် ကမ္ဘာ့အကြီးဆုံးဒုက္ခသည်စခန်းတည်ရှိနေသည်။ ဘင်္ဂလားဒေ့ရှ်အစိုးရသည် အရေးပေါ်တုန့်ပြန်မှုအစီအစဉ်အရ ကုလသမဂ္ဂ ဦးဆောင်သော နိုင်ငံတကာအဖွဲ့အစည်းများ၏ အကူအညီဖြင့် ဒုက္ခသည်များ၏ လိုအပ်ချက်များကို အမြန်ဆုံး ဖြည့်ဆည်းရန် ကြိုးစားနေသည်။ 


ဒုက္ခသည်စခန်းများရှိ နိုင်ငံတကာအဖွဲ့အစည်းများအကြား ညှိနှိုင်းဆောင်ရွက်နေသော The Inter Sector Coordination Group ( ISCG ) က ၂၀၁၈-ခုနှစ် ဒီဇင်ဘာလတွင် ရေးသွင်းခဲ့သည့် ဒုက္ခသည်ဘင်္ဂါလီဦးရေမှာ ၉၅၇,၀၀၀- ဦး ရှိခဲ့သည်။ ထိုစဉ်မှစ၍ ဒုက္ခသည်စခန်းများတွင် မွေးဖွားသော ကလေးပေါင်း ၇၅,၀၀၀ ခန့် ရှိခဲ့သည်။ ၂၀၂၀ ပြည့်နှစ် ဇူလိုင်လတွင်မူ ဒုက္ခသည် ဦးရေမှာ ၈၆၀,၀၀၀ အထိ ကျဆင်းသွားခဲ့သည်။

  
စောစောပိုင်းတွင် အတူတကွ စုရုံးရောက်ရှိလာခဲ့သည့် ဒုက္ခသည်အမြောက်အများကို RRRC နှင့် ISCG တို့ ပူးပေါင်းလျှက် တွက်ချက်ခဲ့သည်။ ISCG က လူဦးရေရွေ့လျားမှုကို ခြေရာခံ၍ RRRC ၏ နိုင်ငံကူးလက်မှတ်ဌာနက စစ်တမ်းတစ်ခု ကောက်ယူခဲ့သည်။ ထိုအရေအတွက်မှာ တိုးလာမည်ဟု မျှော်လင့်ရပြီး ဒုက္ခသည်များအား အစားအစာနှင့်အခြားပစ္စည်းများအတွက် သုံးလေးကြိမ် မှတ်ပုံတင်သည်ကို တွေ့ရသည်။

  
ယခင် အချက်အလက်များတွင် ရှေ့နောက်မညီမှုများရှိခဲ့သည်။ ထိုအတွက် မကြာမီက နိုင်ငံခြားရေးဝန်ကြီးဌာနနှင့် ကုလသမဂ္ဂဒုက္ခသည်များဆိုင်ရာမဟာမင်းကြီးရုံးUNHCR တို့ပူးတွဲလျှက် အမှန်တကယ် ကိန်းဂဏန်း ရရှိစေရန် စိစစ်အတည်ပြုခြင်းကို စတင်ခဲ့သည်။ UNHCR အဆိုအရ ယခင်ခန့်မှန်းချက် ၉၁၄၉၉၈-ဦး ဖြစ်၍ လက်ရှိအရေအတွက်မှာ ၈၆၀,၆၉၇-ဦး ဖြစ်ရာ ကွာခြားချက် ၆ ရာခိုင်နှုန်းထက် နည်းသည်။ ကမ္ဘာအနှံ့အပြားရှိ ဒုက္ခသည်အမြောက်အများကို ပြောင်းရွှေ့နေရာချထားခြင်း ကိန်းဂဏန်းနှင့် ယှဉ်ထိုးစဉ်းစားလျှင် ယခု ကွာခြားသည့် ပမာဏမှာ “ မများလွန်း “ ဟု ဆိုနိုင်သည်။


ယခုနောက်ဆုံးကိန်းဂဏန်းမှာ ၂၀၂၀၊ သြဂုတ် ၃၁ အထိဖြစ်ပြီး ဘင်္ဂလားဒေ့ရ်ှအစိုးရက ဖက်စပ်လုပ်ကိုင်သည့် ဘိုင်အိုမက်ထရစ်နည်းပညာဖြင့် မှတ်ပုံတင်ခြင်းမှ ထွက်ပေါ်လာသည့် ရလာဒ်အပေါ် အခြေခံသည်။ သြဂုတ်လ ၂၀၁၇ မှ စတင်၍ အလုံးအရင်းဖြင့် ဝင်ရောက်ပြီးနောက် ကြီးမားသော စိန်ခေါ်မှုမှာ ဒုက္ခသည်ဘင်္ဂါလီ အရေအတွက်ကို အတိအကျကို တွက်ချက်ခြင်းထက် အစားအစာနှင့် အမိုးအကာများ ရရှိရေးဖြစ်သည်။ 


ဥရောပနှင့်အခြားကမ္ဘာ့နိုင်ငံများတွင် လူ ၅ – ၁၀ ယောက်ချင်းစီ နေရာထိုင်ခင်းပေးပြီး တစ်ချိန်တည်းတွင် သင့်လျော်စွာ မှတ်ပုံတင်ခြင်းကို ထိရောက်စွာ ဆောင်ရွက်ပေးနိုင်သည်။ ( ကော့ခ်ဘဇားသို့ ) နေ့စဉ်လူပေါင်း သုံး- လေးသောင်း ဝင်ရောက်နေချိန်တွင် ၎င်းမူဝါဒအတိုင်း လိုက်နာမည်ဆိုလျှင် အစာငတ်သေကြဖွယ်ရှိသည်။ ဘင်္ဂလားဒေ့ရှ် ဝန်ကြီးချုပ်က ၎င်းတို့အား စာနာမှုကို အခြေခံလျှက် ခိုလှုံခွင့်ပေးခဲ့ရာ ငတ်မွတ်ခေါင်းပါးခြင်းကြောင့် သေဆုံးခြင်းသူ တစ်ယောက်မှ မရှိဟု အနည်းဆုံးတော့ ဂုဏ်ယူနိုင်ပါသည်။ 


၂၀၁၇-ခုနှစ် လူအများ အစုအပုံလိုက် ထွက်ပြေးလာချိန်မှစ၍ ယခုထိရရှိသော အတွေ့အကြုံများကို ပြန်လှန်သုံးသပ်ရလျှင် လက်ရှိအခြေအနေတွင် စိန်ခေါ်လျှက်ရှိသည်မှာ တရားဥပဒေစိုးမိုးရေးဖြစ်သည်။ ၁-စတုရန်းမိုင်လျှင် လူပေါင်း ၃,၂၀၀ ကျော် နေထိုင်သည့် ဘင်္ဂလားဒေ့ရှ်oသည် ကမ္ဘာပေါ်တွင် လူဦးရေအထူထပ်ဆုံး တိုင်းပြည်တစ်ခုဖြစ်ပြီး အိမ်ရာအကြပ်အတည်းရှိသည်။ ဒုက္ခသည်ဘင်္ဂါလီများအတွက် လူသားချင်းစာနာမှုအရ  ဒုက္ခသည်စခန်းအဖြစ်အစိုးရက နေရာပေးနိုင်သည်မှာ  ဧက ၆၅၀၀ ခန့်ဖြစ်ပြီး ၁၀ စတုရန်းမိုင်မျှသာရှိသည်။ ထိုအကျယ်အဝန်းတွင် လူ ၁-သန်းခန့် နေထိုင်လျှက်ရှိပြီး အထပ်မြင့် အခန်းများ မရှိချေ။ အချို့နေရာများတွင် ၁-စတုရန်း ကီလိုမီတာလျှင် လူ ၄-သောင်းမှ ၃-သိန်းအထိ နေထိုင်လျှက်ရှိပြီး အချို့စခန်းများတွင် ၎င်းထက် များသည်။ 


ဥပဒေစိုးမိုးရေးသမားများမှာ တက်ကြွစွာအလုပ်လုပ်နေသော်လည်း လူဦး ရေထူထပ်သည့် နယ်မြေများ၌ တရားဥပဒေစိုးမိုးရေး ထိန်းသိမ်းရန် ကြီးမားသည့် စိန်ခေါ်မှုကြီး ဖြစ်နေသည်။ 
ဘင်္ဂလား ပင်လယ်အော်ရှိ ဝေးလံခေါင်ဖျား ဘာဆန်ချာကျွန်း၌ ဒုက္ခသည်ဘင်္ဂါလီများအား ပြန်လည်နေရာချထားရန် အစိုးရက စီစဉ်နေသည်။ ဒုက္ခသည်များကလည်း ထိုနေရာသို့ သွားရောက် နေထိုင်လိုကြပါသည်။ 


လွန်ခဲ့သည့်ရက်အနည်းငယ်က အာဏာပိုင်များသည် ဒုက္ခသည် ၄၀ အား ကျွန်းသို့ ခေါ်ဆောင်ပြသခဲ့ရာ ၃ – ၄ ဦးသာ ပြောင်းရွှေ့လိုခြင်းမရှိကြောင်း စခန်းတာဝန်ခံများကို ကိုးကား၍ RRRC မဟာမင်းကြီးက ဆိုပါသည်။ ဒုက္ခသည်ဘင်္ဂါလီအားလုံးခြုံ၍ပြောရလျှင် ၎င်းတို့မှာ ပြောင်းရွှေ့ရန် အသင့်ရှိသည်။ ဘင်္ဂလားဒေ့ရှ် ရေတပ်မတော်က ကျွန်းပေါ်တွင် ဒုက္ခသည် ၁-သိန်းခိုလှုံရန် ပြင်ဆင်တည်ဆောက်ပေးထားသည်။ သီးခြားမီးဖိုချောင်နှင့် အခန်းများပါဝင်ပြီး နေရာထိုင်ခင်းကောင်းသည်။ အသက်မွေးဝမ်းကျောင်းလုပ်ရန်နှင့် ငါးမွေးမြူရေးလုပ်ငန်းများ ရှိသည်။ ဘာဆန်ချာကျွန်းတွင် ထိုအတွက် ကြိုတင်စီစဉ်ထားပြီး နေရာကျယ်ကျယ်ဝန်းဝန်း ရှိသည်။ 



လူ့အခွင့်အရေးအဖွဲ့အစည်းများသည် မြန်မာက ဒုက္ခသည်ဘင်္ဂါလီများအား ပြန်လည်ခေါ်ဆောင်ရန်နှင့် လူမျိုးနွယ်အပေါ် သတ်ဖြတ်သူများအား တရားစွဲဆိုရန် ဖိအားပေးရမည့်အစား ဘာဆန်ချာကျွန်းမှ ဒုက္ခသည်ဘင်္ဂါလီများအား ပြန်ခေါ်ရန် ပြောဆိုနေသည်ဟု ဘင်္ဂလားဒေ့ရှ်အာဏာပိုင်များက စွပ်စွဲပါသည်။ နိုင်ငံအသီးသီးမှ လာရောက်ကြသည့် ဝန်ကြီးမင်းများကမူ မြန်မာပြည်သို့ ပြန်ရန်ခွင့်မပြု ( ဘာဆန်ချာကျွန်း၌ နေရာချထားခြင်းကိုလည်း သဘောမတူ ) ဟု ပြောနေသည်။ 


၂၀၁၇ ခုနှစ်ကုန်ပိုင်းတွင် ဘင်္ဂလားဒေ့ရ်ှသည် ဒုက္ခသည်များနေရပ်ပြန်ရေးအတွက် မြန်မာနှင့် သဘောတူညီချက်ကို လက်မှတ်ရေးထိုးခဲ့သော်လည်း လုပ်ငန်းစတင်ရန် ကြိုးပမ်းမှုမှာ နှစ်ကြိမ်တိုင်တိုင် ပျက်ပြားခဲ့သည်။ ရခိုင်ပြည်နယ်ရှိအခြေအနေသည် မြန်မာနိုင်ငံက နိုင်ငံသားဖြစ်ခွင့်ကို ငြင်းပယ်ခံထားရသော ဒုက္ခသည်များအတွက် အန္တရာယ်ရှိနေဆဲဖြစ်သည်ဟု အပြည်ပြည်ဆိုင်ရာအဖွဲ့အစည်းများက ပြောဆိုကြသည်။ ဒုက္ခသည်များကလည်း ၎င်းတို့၏ လုံခြုံရေး၊ ကျန်းမာရေးစောင့်ရှောက်မှုနှင့် ပညာရေးကဲ့သို့သော အခြေခံ နိုင်ငံသားအခွင့်အရေးများကို မြန်မာနိုင်ငံက မပေးအပ်သရွေ့ ပြန်မသွားဟု ငြင်းဆန်လျှက်ရှိသည်။

  
ဘင်္ဂလားဒေ့ရ်ှနိုင်ငံတွင် ကိုရိုနာဗိုင်းရပ်စ်လူနာတွေ့ရှိကြောင်း ပထမဆုံးအကြိမ် အစီရင်ခံ ပြီးနောက် ၂-လ အကြာ ဒုက္ခသည်စခန်းအတွင်း၌ Covid-19 လူနာကို ဖော်ထုတ်နိုင်ခဲ့သည်။ ယခုချိန်အထိ စစ်ဆေးစမ်းသပ်ခဲ့သော ဒုက္ခသည်စုစုပေါင်း ၁၁,၀၀၀ ခန့်ရှိပြီး ကိုရိုနာဗိုင်းရပ်စ်ပိုးတွေ့ရှိသူ ၂၇၀ ခန့် ရှိသည်။ ဆေးရုံမှ ဆင်း ခွင့်ရသူ ၁၀၀ ကျော်သည်။ 


စမ်းသပ်မှုအရေအတွက်အရ နှိုင်းယှဉ်လျှင် နိုင်ငံအတွင်း ပျမ်းမျှ ၂၀ ရာခိုင်နှုန်းခန့်ရှိသော်လည်း ဒုက္ခသည်စခန်းများတွင် ၂.၅ ရာခိုင်နှုန်းအောက်သာရှိသည်။ သံသယဖြစ်ဖွယ်လူနာများအတွက် ကုတင် ၅၀၀ ဆန့် သီးခြားစင်တာတစ်ခုတည်ဆောက်ထားသည်။ နေရပ်ပြန်ရေး ကြားစခန်းများကို ကွာရန်တင်း စင်တာများ အဖြစ်ပြောင်းလဲထားပြီး အမျိုးသမီးများအတွက် ဆီလျော်သော နေရာရှိသည်။ သင်ကြားရေးစင်တာများကို ကွာရန်တင်း စင်တာများအဖြစ်သို့ ပြောင်းလဲခြင်းလည်း ပါဝင်သည်။ 


ကော့ခ်ဘဇား၌ ဒုက္ခသည်စခန်းများ ထွန်းပေါ်လာခြင်းသည် ဒေသခံများအတွက် အလုပ်အကိုင်အခွင့်အလမ်းကောင်း အမှန်ဖြစ်သော်လည်း ၎င်းတို့၏ နည်းပညာစွမ်းရည်များ ဖွံ့ဖြိုးတိုးတက်စေရန် အဆင့်များ လိုအပ်နေသေးသည်။ အူခီယာနှင့် တက္ကနဖ်ဒေသခံများမှာ အနည်းငယ် ရှေးရိုးစွဲဆန်သည်။ ကိုရိုနာဗိုင်းရပ်စ်ရောဂါ ကူးစက်ပြန့်နှံ့နေချိန်တွင် လူသားချင်းစာနာမှုဆိုင်ရာ နိုင်ငံခြားလုပ်သားများက သူတို့၏ နိုင်ငံသို့ ပြန်သွားကြသည်။ ၎င်းတို့ပြန်သွားခြင်းမှာ ရောဂါကူးစက်မှုနှင့် သက်ဆိုင်သည်ဟု တစ်ထစ်ချတော့ မဆိုနိုင်ပါ။ 


RRRC တွဲဘက်မဟာမင်းကြီးကမူ အခြေအနေကို အကောင်းမြင်သည်။ ဘင်္ဂလားဒေ့ရှ်နိုင်ငံသားတို့သည် အဆိုပါ ( နိုင်ငံခြားသားတို့၏ ) တာဝန်ကြီးကြီးနေရာတွင် တဖြည်းဖြည်း ပြောင်းလဲယူသင့်သည်ဟု အကြိမ်ကြိမ် တိုက်တောင်းဆိုခဲ့သည်။ 


သို့သော် ဒေသန္တရ ဝန်ထမ်းများ၏ နည်းပညာကျွမ်းကျင်မှုမှာ ပကတိအခြေအနေတွင် မြင့်မားစေရန် အရေးကြီးသည်။ အနာဂါတ်တွင် ဘင်္ဂလားဒေ့ရှ်လုပ်သားများသည် နိုင်ငံ့ပြင်ပ အလားတူ အခင်းအကျင်းမျိုး၌ အလုပ်အကိုင်များ ရရှိနိုင်သည်ဟု ဘင်္ဂလားဒေ့ရှ်အစိုးရ ( RRRC ) တွဲဘက်ကော်မရှင်နာမင်းကြီး မိုဟာမက်ရှာမ်ဆူဒူဇာက သုံးသပ်ပြောကြားသည်။ 


(( ပြဿနာ အကြပ်အတည်းဖြစ်လာလျှင် ကြီးသောအမှု့ ငယ်အောင်၊ ငယ်သောအမှု ပပျောက်အောင် ဆောင်ရွက်နိုင်လျှင် အကောင်းဆုံးဖြစ်သည်။ မိမိကိုယ်ကျိုးစီးပွားမငဲ့ကွက် အတွင်းကြိတ်ရည်မှန်းချက်မပါပဲ အကောင်းမြင်စိတ်ဖြင့် များများဖြေရှင်းနိုင်ရန်လိုအပ်သည်။ နိုင်ငံ/အဖွဲ့အစည်း/လူပုဂ္ဂိုလ်တစ်ဦး၏ အောင်မြင်ခြင်း-ကျရှုံးခြင်းဆိုသည်မှာ ၎င်းတို့၏ IQ, EQ နှင့် အသီးသီးသက်ဆိုင်သည်။ 

ဤတွင် IQ,EQ ဆိုသည်မှာလည်း တတ်နိုင်သရွေ့ အချက်အလက်မှန်ရရှိမှသာ ဖြစ်နိုင်သည်။ အလွယ်တကူမဟုတ်နိုင်သော်လည်း ချစ်ခြင်း-မုန်းခြင်းကို အတတ်နိုင်ဆုံး ချိန်ဆနိုင်ပါလျှင် သားစဉ်မြေးဆက် ပုခုံးထက်သို့ ဒုတ်ထမ်း ဒါးထမ်းအဖြစ် ရောက်တော့မည့် ပြဿနာ၏ အဖြေကို တွေ့ ရှိနိုင်သည်။ 

ထို့ကြောင့် bdnews ပါ သတင်းဆောင်းပါးကို အတတ်နိုင်ဆုံး အပြည့်အစုံ ဖော်ပြလိုက် ရပါ သည်။    ။ သတင်းဘာသာပြန်သူ ))

#ကော့ခ်ဘဇားဒုက္ခသည်အရေအတွက်နှင့်လက်ရှိအခြေအနေ


((( bdnews24., 09 Oct 2020, “New Rohingya population figure in Bangladesh is accurate: official. By: Hassan Bipul, bdnews24.com.” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။ )))

https://bdnews24.com/bangladesh/2020/10/09/new-rohingya-population-figure-in-bangladesh-is-accurate-officia

0

Leave a Reply

Your email address will not be published.