ဂျော့ဖလွိုက်အရေး ကန့်ကွက်သူတို့၏ ဆန္ဒပြပွဲများ အမေရိကန်မှ အင်္ဂလန်နှင့် ဥရောပသို့ ကူးစက်၊ လူမျိုးခွဲခြားမှုဆန့်ကျင်သူတို့ ရာစုနှစ်သက်တမ်းရှိ ကိုလိုနီခေတ် သမိုင်းဝင်ဆိုသည့် ရုပ်ထုများကို ပစ်မှတ်ထားလာ

မေလ ၂၅-ရက်နေ့ အမေရိကန် မင်နီဆိုတာပြည်နယ်တွင် အသက် ၄၆-နှစ်အရွယ် အမေရိကန်လူမည်း ဂျော့ချ် ဖလွိုက်သေဆုံးရခြင်းအတွက် ဥရောပနိုင်ငံများသို့ ပြန့်နှံ့လာသော ကန့်ကွက်သူများသည် တနင်္ဂနွေနေ့တွင် ဒုတိယမြောက်နေ့အဖြစ်ဆင်နွှဲကြသည်။ ဗြိတိန်၊ အီတလီ၊ စပိန်၊ ဘယ်လ်ဂျီယံ၊ ဒိန်းမတ်နှင့် ဟန်ဂေရီနိုင်ငံရှိ လူထောင်ပေါင်းများစွာတို့သည် လမ်းမများပေါ်တွင် အသီးသီးစုရုံးခဲ့ကြပြီးနောက် “ လူမျိုးရေးခွဲခြားမှု ပပျောက်ရေး” အဖြစ် သမိုင်းဝင် ရုပ်ထုများအား ပစ်မှတ်ထားခဲ့ကြကြောင်း Euro News က ယမန်နေ့ ဖော်ပြသည်။

စပိန်နိုင်ငံ မက်ဒရစ်မြို့၌ လူပေါင်း ၃,၀၀၀ ခန့်သည် ဂျော့ချ်ဖလွိုက်၏ နောက်ဆုံးစကား “ ငါ အသက် မရှူနိုင်တော့ဘူး “ နှင့် “တရားမျှတမှုမရှိလျှင် ငြိမ်းချမ်းမှုမရှိ” ပိုစတာများအား ကိုင်ဆောင်ကာ အမေရိကန်သံရုံးရှေ့တွင် စုဝေးကြွေးကြော်ခဲ့ကြသည်။ အချို့သောဆန္ဒပြသူများသည် အမေရိကန်သမ္မတ ဒေါ်နယ်ထရမ့် ဆန့်ကျင်ရေး ရုပ်ပုံကားချပ်များ ကိုင်ဆောင်ထားကြသည်။

ဆန္ဒပြျမှုကို စပိန်နိုင်ငံ မက်ဒရစ်မြို့တော်နှင့်အလားတူ ဘာစီလိုနာတွင်လည်း ကျင်းပကြပြီး မက်ဒရစ်မှဆန္ဒပြသူများသည် ၂၀၁၆ ခုနှစ်တွင် အမေရိကန် ဘောလုံးသမား ကောလင်း ကဲပါနစ်က စတင်ခဲ့သည် “ လူမည်းတို့ ဘဝအရေးပါခြင်း “ Black Lives Matter သင်္ကေတဖြစ်သည့် မြေပြင်ပေါ်တွင် ဒူးတစ်ဖက် ထောက်ခဲ့ကြသည်။


လူမျိုးရေးခွဲခြားမှု ဆန့်ကျင်ရေးဆန္ဒပြပွဲများသည် အီတလီနိုင်ငံ မီလန်နှင့် ရောမမြို့၊ ဘယ်လ်ဂျီယန်နိုင်ငံ ဘရပ်ဆဲလ်-အင်ဝပ်နှင့် ဂမ့်မြို့၊ ဟန်ဂေရီနိုင်ငံ ဘူဒါပက်စ်မြို့၊ ဒိန်းမတ်နိုင်ငံ ကိုပင်ဟေဂင်မြို့နှင့် ဗြိတိန်နိုင်ငံ ဂလပ်စ်ကိုနှင့် လန်ဒန်မြို့တို့၏ သက်ဆိုင်ရာအမေရိကန်သံရုံးအသီးသီးရှေ့တွင် ဖြစ်ပွားကြောင်း တွေ့ရှိရသည်။


ဘယ်လ်ဂျီယန်နိုင်ငံ ဘရပ်ဆဲလ်မြို့တော်တွင် ခန့်မှန်း ၁၀,၀၀၀ ခန့်ရှိမည့် ကန့်ကွက်ဆန္ဒပြသူများအနက် အချို့က အာဖရိကအား ကိုလိုနီပြုခဲ့သူ ဒုတိယမြောက် လီယိုပိုလ်ဘုရင်၏ ရုပ်ထုပေါ်သို့ တွယ်တက်ကြပြီး “ လူသတ်သမား “ ဟု အော်ဟစ်ရှုတ်ချကာ ကွန်ဂိုဒီမိုကရက်တစ်သမ္မတနိုင်ငံအလံကို ဝှေ့ယမ်းကြသည်။


ထိုအတောအတွင်း တနင်္ဂနေ့၌ လန်ဒန်မြို့ အနောက်ဘက် မိုင် ၁၁၀-ခန့် အကွာရှိ ဘရစ္စတိုလ်မြို့တွင် ၁၇ ရာစု ကျွန်ကုန်သည်အက်ဒွပ် ကူးလ်စ်တန် ၏ရုပ်တုကိုဖြိုချကာ လမ်းမများပေါ်တွင် ဒရွတ်တိုက်ဆွဲ ရှုတ်ချပြီးနောက် အေဗွန်မြစ်အတွင်း ပစ်ချခဲ့သည်။

ဗြိတိသျှ အာဏာပိုင်များသည် ကိုရိုနာဗိုင်းရပ်စ်ရောဂါကြောင့် လတ်တလော Lockdown တားဆီးပိတ်ဆို့ ထားစဉ်အတွင်း ကန့်ကွက်ဆန္ဒပြပွဲများမဖြစ်ရအောင် ၆-ယောက်ထက်ပို၍ မစုဝေးရအမိန့်ထုတ်ပြန်ခြင်းဖြင့် တားဆီးရန် ကြိုးစားခဲ့သည်။

စနေနေ့၌ လန်ဒန်မြို့လည်ရှိ ဘောရစ်ဂျွန်ဆင်၏ ဝန်ကြီးချုပ်ရုံးအနီး ကန့်ကွက်ပွဲများတွင် လူပေါင်း သိန်းချီ စုဝေးပြီးနောက် ဆန္ဒပြသူများနှင့် ရုန့်ရင်းဆန် ခတ်ဖြစ်ပွားရာ ရဲတပ်ဖွဲ့ဝင် ၁၄-ဦး ဒါဏ်ရာရရှိကြောင်း၊ ရဲတပ်ဖွဲ့ဝင်များအပေါ်စော်ကားမှုသည် အလွန်တုန်လှုပ်ဖွယ်ဖြစ်ပြီး လုံးဝလက်ခံနိုင်စရာ မရှိကြောင်း၊ ဥပဒေအရ အရေးယူရလိမ့်မည်ဖြစ်ကြောင်း လန်ဒန်မြို့တော် ရဲမင်းကြီးက ပြောဆိုသည်။


လန်ဒန်မြို့တော်ဝန် ဆာဒစ်ခန်ကလည်း အကြမ်းဖက်မှုများဖြစ်ပွားခြင်းမှာ မည်သို့မျှ လက်ခံနိုင်ဖွယ် မရှိကြောင်း၊ ဆန္ဒပြသူများအနေဖြင့် Social Distancing လူချင်းနီးကပ်မှု ဝေးကွာစေရေး ပြဋ္ဌာန်းချက်များ ကို ဆက်လက်ထိန်းသိမ်းကြရန် တိုက်တွန်းခဲ့သည်။


စနေနေ့မှာပင် ဂျာမနီနှင့် ပြင်သစ်၌တို့လည်း ကြမ်းဖက်ရုန်းရင်းဆန်ခတ်မှုများ တွေ့မြင်ရသည်။

ဂျာမနီနိုင်ငံ ဘာလင်မြို့တွင် အလက်ဇန္ဒားရင်ပြင်၌ စုဝေးနေသူ ၁၅,၀၀၀ ခန့်ကို လူစုခွဲရန် အမိန့်ပေးနေစဉ်မှာပင် လူအုပ်ကြီးက ပုလင်းများ၊ ကျောက်တုံးများ ပစ်ပေါက်ကြခြင်းကြောင့် ရဲတပ်ဖွဲ့ဝင်အများအပြားနှင့် သတင်းစာဆရာတစ်ဦး ဒဏ်ရာရခဲ့ကြောင်း၊ ရုန့်ရင်းဆန်ခတ်မှုနှင့်ပတ်သက်၍ ဖမ်းဆီးခဲ့ရသူ ၉၃-ဦးရှိကြောင်း သိရှိရသည်။


ပြင်သစ်နိုင်ငံ၊မာဆေးမြို့တွင်မူ ငြိမ်းချမ်းစွာ ဆန္ဒပြရာမှ ပုလင်းများနှင့်ကျောက်ခဲများဖြင့်ပစ်ပေါက် အကြမ်းဖက်မှုများဖြစ်ပေါ်လာသဖြင့် ရဲတပ်ဖွဲ့ဝင်များက မျက်ရည်ယိုဗုံးများနှင့် ငရုတ်ကောင်းမှုန်စပရေးများ အသုံးပြုကာ လူစုခွဲခဲ့ရသည်။

(( အစဉ်လေးစာအပ်သော မိတ်ဆွေများခင်ဗျား၊ အမေရိကန် မင်နီဆိုတာပြည်နယ်မှ ကန့်ကွက်ဆန္ဒပြပွဲသည် အချိန်တိုအတွင်း အမေရိကန်နိုင်ငံတစ်ဝှမ်း မြို့ကြီးများသိူ့ ပြန့်နှံ့သွားယုံမက အင်္ဂလန်နှင့် ဥရောပသို့တိုင် ကူးစက်သွားရခြင်းနှင့် မည်သူတို့ ဆန္ဒပြနေသည်ကို သိလိုပါသဖြင့် မေးမြန်းသူ အများပြား ရှိပါသည်။

ထိုအတွက် လွန်ခဲ့သော ဇွန် ၄-ရက်၌ ကျွန်တော်ဘာသာပြန်ခဲ့သော သတင်းဆောင်းပါးအား ပထမဆုံး ကောမန့် ဘောက်စ်တွင် ပြန်လည်ဖော်ပြပါသည်။


ကျွန်တော်ရေးသားသော စာအမျိုးအစားမှာ ဖတ်သူအကန့် အသတ်ရှိပါသည်။ စာဖတ်သူ အနည်းငယ်မျှ ရှိစေကာမူ တစ်ကြိမ်ဖတ်ယုံနှင့် ဆက်စပ်သိရှိနိုင်ရန် ဓါတ်ပုံ-မြေပုံများတွင် မြန်မာစာရေးထိုးဖော်ပြသော်လည်း ကွန်ပျူတာကျွမ်းကျင်သူမဟုတ် တစ်ယောက်တည်း ဖန်တီးရခြင်းဖြစ်ပါသည်။ ကျွန်တော့်အနေဖြင့် ဓါတ်ပုံ-မြေပုံများကို အကြောင်းမဲ့ ဖော်ပြလေ့ မရှိပါ၍ မိနစ်အနည်းငယ်မျှ အချိန်ပေး လေ့လာသင့်ကြောင်း တိုက်တွန်းအပ်ပါသည်။ ။ သတင်းဘာသာပြန်သူ ))


((( Euro News., June 7, 2020,” ‘No to racism!’: Statues targeted as George Floyd anti-racism protests spread across Europe. By Alessio Dellanna & Alasdair Sandford with AP, AFP ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။ အကြောင်းအရာတူ ဆက်စပ်ဖော်ပြချက် များမှာ ပေးထားပါ Links များ အတိုင်းဖြစ်သည်။ )))


#BlackLivesMatterအမေရိကန်ဗြိတိန်နှင့်ဥရောပ

https://www.euronews.com/2020/06/07/no-to-racism-protests-after-george-floyd-killing-spread-across-europe

https://www.cbs7.com/content/news/Detentions-injuries-after-anti-racism-protests-in-Europe-571083421.html

https://www.euronews.com/2020/06/05/belgian-petition-to-remove-statues-of-colonial-king-gathers-pace-amid-george-floyd-protest

https://www.bbc.com/news/uk-52954305

https://www.theaustralian.com.au/world/black-lives-matter-protesters-deface-winston-churchill-statue/news-story/d3d8a3e08594f88971331aab1e53e6a8

https://edition.cnn.com/2020/06/07/europe/edward-colston-statue-bristol/index.html

https://time.com/5849667/robert-e-lee-confederate-statue-removed/

https://www.wave3.com/2020/06/07/gov-northam-says-robert-e-lee-monument-will-be-removed-soon-possible/

https://www.washingtonpost.com/opinions/2020/06/07/robert-e-lee-is-my-ancestor-take-down-his-statue-let-his-cause-be-lost/

0

One Reply to “ဂျော့ဖလွိုက်အရေး ကန့်ကွက်သူတို့၏ ဆန္ဒပြပွဲများ အမေရိကန်မှ အင်္ဂလန်နှင့် ဥရောပသို့ ကူးစက်၊ လူမျိုးခွဲခြားမှုဆန့်ကျင်သူတို့ ရာစုနှစ်သက်တမ်းရှိ ကိုလိုနီခေတ် သမိုင်းဝင်ဆိုသည့် ရုပ်ထုများကို ပစ်မှတ်ထားလာ”

Leave a Reply

Your email address will not be published.