ဘောရစ်ဂျွန်ဆင်အနိုင်ရပြီးနောက် ဗြိတိသျှမွတ်စလင်များ နိုင်ငံမှ ထွက်ခွာကြရန်ုပြင်ဆင်နေ။ ဘိုဂျို၏ ကွန်ဆာဗေးတစ်အစိုးရ ၅-နှစ် အတွက် မိမိတို့ ပုဂ္ဂလိက လုံခြုံရေး ဗြိတိသျှမွတ်စလင်တို့ စိုးရိမ်

အင်္ဂလန်နိုင်ငံတွင် လတ်တလော ကွန်ဆာဗေးတစ်ပါတီ အနိုင်ရရှိပြီးနောက် ဘောရစ်ဂျွန်ဆင်က ဝန်ကြီးချုပ် အာဏာရရှိမည့် ၅-နှစ်တာ ကာလအတွင်း မိမိတို့၏ ပုဂ္ဂလိကလုံခြုံရေးကို စိုးရွံ့မိကြသော ဗြိတိသျှမွတ်စလင်တို့သည် နိုင်ငံမှ ထွက်ခွာရန် ပြင်ဆင်လျှက်ရှိကြောင်း ဗြိတိန်အခြေစိုက် Metro News က ယမန်နေ့ရေးသားသည်။

ဆင်းရဲသားတို့အား အစားအစာ ပေးဝေလျှက်ရှိသည့် မန်ချက်စတာရှိ မွတ်စလင်ပရဟိတအဖွဲ့တစ်ခုက ထွက်ခွာလိုသူတို့ကို ဦးဆောင်သည်။အစ္စလာမ်ကြောက်ရောဂါရှင်နှင့် လူမျိုးခွဲခြားရေးဝါဒီတစ်ဦး ဝန်ကြီးချုပ်ဖြစ်လာမည့်နိုင်ငံတွင် သူ့သားသမီးများ၏ အနာဂါတ်အတွက် စိုးရွံ့မိကြောင်း ထွက်ခွာရန် ပြင်ဆင်လျှက်ရှိသူတစ်ဦးက ပြောဆိုသည်။

အင်္ဂလန်အား စွန့်ခွာမည့်ကိစ္စနှင့်ပတ်သက်၍ ၎င်းတို့အသိုင်းအဝိုင်းတွင် အငြင်းပွားဖွယ် အမြင်များရှိနေသည်။ အတော်များများ၏ အမြင်တွင် ၂၀၀၅-ခုနှစ်ကတည်းက ဗြိတိန်လူထုအတွင်း အစ္စလာမ်ဘာသာဝင်တို့အပေါ် ကြောက်ရွွံစိတ်ရှိနေကြသည်ဟု မှတ်ယူနေကြသည်။

ဘောရစ်ဂျွန်ဆင်သည် လွန်ခဲ့သည့်နှစ် Telegraph သတင်းစာနှင့် တွေ့ဆုံစဉ် ခေါင်းမြီးခြုံသော မွတ်စလင် အမျိုးသမီးတို့ကို မြင်ရသည်မှာ “ စာတိုက်ပုံးလား ဘဏ်ဒါးပြလား ထင်ရတယ်” ဟု မှတ်ချက်ပေးခြင်းဖြင့် အုတ်အော်သောင်းတင်းဖြစ်ခဲ့ဖူးသည်။ ရွေးကောက်ပွဲယှဉ်ပြိုင်မည့် နိုင်ငံသမားတစ်စုကလည်း မွတ်စလင်တို့ကို ပစ်ပယ်သည့် အမျိုးသားရေးဝါဒီ တော်မီရော်ဘင်ဆင်၏ အာဘော်များကို ဝေငှနေကြသည်။

ဒီဇင်ဘာ ၁၂-ရက်နေ့ ရွေးကောက်ပွဲတွင် ကွန်ဆာဗေးတစ်ပါတီက သောင်ပြိုကမ်းပြိုအနိုင်ရသည့်အခါ မန်ချက်စတာ မွတ်စလင်ပရဟိတအသင်းကို တည်ထောင်ခဲ့သူ မန်ဆာအလီက သူ့သားသမီးများနောင်ရေးအတွက် ဘေးကင်းလုံခြုံမည့်နေရာသို့ ပြောင်းရွှေတော့မည်ဟု Metro မီဒီယာအား ပြောပြသည်။ ပရဟိတအသင်း၏ ဆယ်နှစ်တာကာလအတွင်း စစ်သားဟောင်းများ လူဖြူအလုပ်သမားများအပါအဝင် အခက်အခဲရှိသူတိုင်းအား အကူအညီပေးခဲ့သည်။ သို့သော် သူ၏ ပုဂ္ဂလိက လုံခြုံရေး သားသမီးများ နောင်ရေးအတွက် ထိတ်လန့်စိတ်က စိုးမိုးနေသည်ဆို၏။

ကွန်ဆာဗေးတစ်တို့တွင် အစ္စလာမ်ကြောက်စိတ်က အမြစ်တွယ်နေပြီး ဘောရစ်ဂျွန်ဆင်အနေဖြင့်လည်း ထိုအချက်ကို ဖယ်ရှားရန် ပျက်ကွက်ခဲ့သူတစ်ဦးအဖြစ် သူရှု့မြင်သည်။ ဗြိတိန်သည် သူ၏ နားခိုရာဖြစ်နေပြီး ဗြိတိန်မှ လွဲလျှင် ဘယ်သွားရမှန်း မသိသေးပါ။ သို့သော် ဗြိတိန်အား စွန့်ခွာလျှင် ကောင်းလိမ့်မည်ကို သူ့မိသားစုကပါ သဘောတူကြောင်း သိရှိရသည်။ စာနာစိတ်နှင့် ဖော်ရွေသော နယူးဇီလန်သို့ သွားသင့်သည်ဟု စိတ်ကူးမိသော်လည်း လက်ယာစွန်းအကြမ်းဖက်သမားလက်ချက်နှင့် လူ ၅၁ ယောက်သေဆုံးခဲ့ရသော ခရစ်စ်ချတ်ဗလီ သေနတ်ပစ်ခတ်မှု့ရှိဖူးသည်။

((( လတ်တလောနှစ်များ၌ ဥရောပနိုင်ငံများတွင် ဒုတိယကမ္ဘ္ဘာစစ်နောက်ပိုင်း အကြီးမားဆုံးရွှေပြောင်း အခြေချသူများအရေး အကြပ်အတည်းှနှင့် ရင်ဆိုင်နေရသည်။ ကုလသမဂ္ဂရွှေ့ပြောင်းသွားလာသူများဆိုင်ရာအဖွဲ့ ( IOM ) နှင့် ဒုက္ခသည်များဆိုင်ရာအဖွဲတို့ ထုတ်ပြန်ချက်အရ ၂၀၁၅-ခုနှစ် တစ်နှစ်တည်း၌ပင် ဥရောပသို့ ဝင်ရောက်လာသူ ၁-သန်းကျော်ရှိသည်။ ထိုပမာဏမှာ ၂၀၁၄-ခုနှစ်ထက် ၄ ဆပို၍ များသည် ။ လက်ရှိတွင် တူရကီ၌ စစ်ဘေးရှောင်ရွှေ့ပြောင်းဝင်ရောက်သူ ၃.၆-သန်းခန့်ရှိနေသည်။ အမေရိကန် ဥရောပတို့နှင့် အစေးမကပ်သော သမ္မတအာဒိုဂန်က ဥရောပသို့ တာစူနေသည့် အဆိုပါ ရွှေ့ပြောင်းအခြေချစခန်းများကို ဂိတ်တံခါးဖွင့်ချလိုက်မည်ဟု မကြာခဏ ချိန်းခြောက်လျှက်ရှိသည်။

 “ လူသားချင်းစာမှု့ ဥရောပတန်ဖိုးအဖြစ် “ ဒီမိုကရေစီအရေး ဆော်သြသူ ဘီလျံနာသူဋ္ဌေးကြီး ဂျော့ဆိုရော့စ်ကလည်း ဖိအားပေးပါသည်။ ဤတွင် ဥရောပနိုင်ငံများအတွက် ရွှေ့ပြောင်းအခြေချသူများအား ခွဲတမ်းချလက်ခံရန်ဖြစ်လာသည်။ ဂျာမနီက ပိုပြီး များများယူသင့်သည်ဟု အော်သံကြားရသလို ဘဏ္ဍာရေးအကြပ်အတည်းနှင့် ကြုံနေရသော ဂရိကလည်း ဒုက္ခသည်ပြဿနာကို ဘယ်လိုမှ တောင့်မခံနိုင်တော့ဟု ညည်းညူးလျှက်ရှိသည်။ ဤတွင် ဗြိတိန်နိုင်ငံက ဥရောပမှ ခွဲထွက်မည့် Brexit “ ဘရီဇစ် “ မှာ ၂၀၁၆-ခုနှစ်တွင်မွေးဖွားလာတော့သည်။

ရွှေ့ပြောင်းဝင်ရောက်သူများ၏ ယဉ်ကျေးဓလေ့ထုံးတမ်း ခြားနားမှု့ကြောင့် ဦးနှောက်ခြောက်နေသော ဥရောပသည် ဒုက္ခသည်များနှင့် ရောနှောပါလာသည့် အယ်လ်ကိုင်ဒါနှင့် အိုင်အက်စ်အစွန်းရောက်တို့၏ အကြမ်းဖက်ခြင်းကိုလည်း အကြိမ်ကြိမ်ရင်ဆိုင်နေရသည်။

စက်မှု့ဖွံ့ဖြိုးပြီး ချမ်းသာသော နိုင်ငံအများစုဖြစ်သည့် ဥရောပသည် အမှန်တကယ်ပင် ရွာကြီးတစ်ရွာလိုဖြစ်နေသည်။ တစ်နိုင်ငံတွင် နံနက်စာ စားပြီး နေ့လည်စာကို အခြားတစ်နိုင်ငံတွင်စားကာ ညစာကို နောက်တစ်နိုင်ငံ၌ စားရနိုင်အောင် သယ်ယူပို့ဆောင်ရေးနှင့် ကူးလူးသွားလာမှု့ အလွန်များသည်။ ထိုသို့သော အသိုင်းအဝန်းမှ ဗြိတိန်နှုတ်ထွက်ရန် ဥရောပနိုင်ငံများနှင့် အပေးအယူဆွေးနွေးသင့်-မသင့် ပေါ်လစီချမှတ်ရေး သဘောကွဲလွဲသဖြင့် နိုင်ငံခြားရေးဝန်ကြီး ဘိုဂျို ခေါ် ဘောရစ်ဂျွန်ဆင်နှုတ်ထွက်သွားသည်။ နောက်ဆုံး ဝန်ကြီးချုပ် ထရီဇာမေလည်း နှုတ်ထွက်ရကာ ယခု ဘိုဂျိုဝန်ကြီးချုပ် ဖြစ်လာပြန်ချေသည်။

မြန်မာနိုင်ငံချစ်ကြည်ရေးခရီး ရွှေတိဂုံဘုရားအား ဖူးမျှော်စဉ် ခေါင်းလောင်းထိုးခိုက် ဗြိတိသျှနယ်ချဲ့စံနစ် မြေတောက်မြှောက်ပေးရေးစာဆို Rudyard Kipling ရတ်ဒ်ယတ်ကစ်ပလင်၏ “ မန္တလေးသို့ လမ်း “ ကဗျာအပိုင်းအစကို ရွတ်ဆိုခဲ့သူ ဘိုဂျိုကား ဗြိတိန်ဝန်ကြီးချုပ်ဖြစ်လေပြီ။

ဥရောပပါလီမန်သည် ကွန်ဆာဗေးတစ်တို့အားကောင်းသော ဗြိတိန်၌ ဘိုဂျိုသာ အောင်ပွဲဆင်လိမ့်မည်ကို ကြိုတင်တွက်ဆပြီး ဖြစ်ပါလိမ့်မည်။ ကော့ခ်ဘဇားရောက်နေသူများအား မြန်မာနိုင်ငံက နိုင်ငံသားပေးရန် လွန်ခဲ့သည့် စက်တင်ဘာကတည်းက ကြိုတင် တောင်းဆိုထားပြီးဖြစ်လေသည်။ ။သတင်းဘာသာပြန်သူ ))

(((Metro News., Sunday 15 Dec 2019, “British Muslims prepare to leave UK after Boris Johnson wins election. By: Basit Mahmood ” ကို #HtayOung, #OungMarine ဆီလျော်အောင် ကောက်နှုတ် ဘာသာပြန်ဆိုသည်။)))

https://www.dw.com/en/inside-europe-a-new-migrant-crisis-in-greece/av-51654089

#အခြေချသူများအရေးဥရောပအကြပ်အတည်းှ #ဘောရစ်ဂျွန်ဆင်

0

One Reply to “ဘောရစ်ဂျွန်ဆင်အနိုင်ရပြီးနောက် ဗြိတိသျှမွတ်စလင်များ နိုင်ငံမှ ထွက်ခွာကြရန်ုပြင်ဆင်နေ။ ဘိုဂျို၏ ကွန်ဆာဗေးတစ်အစိုးရ ၅-နှစ် အတွက် မိမိတို့ ပုဂ္ဂလိက လုံခြုံရေး ဗြိတိသျှမွတ်စလင်တို့ စိုးရိမ်”

  1. Magnificent site. A lot of helpful info here. I am sending it
    to some friends ans additionally sharing in delicious.
    And certainly, thank you to your effort!

    0

Leave a Reply

Your email address will not be published.