မြန်မာ၏ ပြည်တွင်းစစ်အလားအလာများမှာ ဘင်္ဂလားဒေ့ရှ်အတွက် အလျှော်အစား အလွန်ကြီးမားဟု သတင်းစာ ယူဆ။ သောင်းကျန်းသူနှင့် မည်သည့်တစ်ဖက်နိုင်ငံသားမျှ ဝင်ရောက်မလာစေရေး မြန်မာနှင့် နယ်နိမိတ်ကို တင်းကြပ်စွာ ကာကွယ်ရန် လိုအပ်ဟု ဆို


ဒေါ်အောင်ဆန်းစုကြည်၏ အစိုးရအား ဖြုတ်ချ၍ စစ်အာဏာသိမ်းယူပြီးနောက် ၂ လခွဲခန့်အကြာ ဧပြီ ၁၃-ရက်နေ့တွင် မြန်မာနိုင်ငံမှာ ဆီးရီးယားကဲ့သို့ အဆုံးစွန်ပြည်တွင်းစစ်ဆီသို့ ဦးတည်နေပြီဖြစ်ကြောင်း ကုလသမဂ္ဂလူ့အခွင့်အရေးဆိုင်ရာ မဟာမင်းကြီး မီရှဲလ်ဘတ်ချလက်က သတိပေးခဲ့သည်ဟု Dhaka Tribune (June 22, 2021) တွင် နိုင်ငံရေးဝေဖန်သုံးသပ်သူ ဟူမေရန်ကဘီယာဘူအီရန်က ရေးသားသည်။

…   
ထိုအချိန်မှစ၍ ဘင်္ဂလားဒေ့ရှ်နှင့် မိုင်ပေါင်း ၁၇၀ ခန့်မျှ ထိစပ်နေသော နိုင်ငံ၏ သိသာစွာ ယိုယွင်းလာခဲ့မှုများမှာ ကမ္ဘာတစ်ဝှမ်းလုံး အထူးသဖြင့် အိမ်နီးချင်းနိုင်ငံများအတွက် စိုးရိမ်ပူပန်မှုများဖြစ်ပေါ်စေသည်။ ပိုမိုဆိုးရွားလာနေသော အခြေအနေများကြောင့် မီရှဲလ်ဘတ်ချလက်မှာ ဇွန်လ ၁၁ ရက်နေ့တွင် နောက်ထပ် သတိပေးချက်ထုတ်ပြန်ခဲ့ရသည်။ မြန်မာနိုင်ငံတွင် အကြမ်းဖက်မှုများ ထပ်မံမြင့်တက်လာခြင်း၊ အသက်ဆုံးရှုံးမှု ပိုမိုများပြားလာစေခြင်းတို့ကို ရပ်ဆိုင်းကြရန်နှင့် လူသားချင်းစာနာထောက်ထားမှုဆိုင်ရာ အရေးပေါ်အကူအညီလိုအပ်ချက်များ နက်ရှိုင်းလာကြောင်း ပြောကြားခဲ့သည်။

…  
စစ်အုပ်ချုပ်ရေးသည် မြန်မာပြည်သူများအတွက် အသစ်အဆန်းတော့ မဟုတ်ပါ။ လွတ်လပ်ရေးရပြီး ၁၉၄၈ ခုနှစ်မှစ၍ အရှေ့တောင်အာရှတွင် တည်ရှိသည့် နိုင်ငံသည် များသောအားဖြင့် စစ်တပ် သို့မဟုတ် အရပ်သားဟန်ဆောင်ထားသော စစ်ဘက်၏ အုပ်ချုပ်မှုအောက်တွင် တည်ရှိသည်။ သို့သော် ယခုအချိန် ဝန်းကျင်အခြေအနေသည် ယခင်နှင့် ကွဲပြားခြားနားသည်။

…  
လူအများအနေဖြင့် စစ်အုပ်ချုပ်မှုမှာ တော်လောက်ပြီဟု မြင်မှတ်ပုံရသည်။ ဖေဖော်ဝါရီ ၁ ရက် နေ့တွင် စစ်တပ်က အာဏာသိမ်းပြီးနောက် အရပ်သားအစိုးရပြန်လည်ထူထောင်ရေး မြန်မာပြည်သူများနှင့် စစ်အစိုးရတို့အကြား လက်ရည်မမျှတသော တိုက်ပွဲများဖြစ်ပွားခဲ့သည်။ စစ်အစိုးရ၏လက်ချက်ဖြင့် ယခုအချိန်အထိလူ ပေါင်း ၉၀၀ ခန့် သေဆုံးခဲ့သည်။

…  
အတိုက်အခံအလွှာသည် စစ်အစိုးရကို တန်ပြန်ရန် အခြားအစိုးရဖြစ်သော အမျိုးသားစည်းလုံးညီညွှတ်ရေး အစိုးရကို ဖွဲ့စည်းခြင်းဖြင့် ကစားပွဲကို အရှိန်မြှင့်တင်ခဲ့သည်။ ထိုသူတို့ကပင် ပြည်သူ့ကာကွယ်ရေးအင်အားစု PDF ခေါ် လက်နက်ကိုင်တပ်ဖွဲ့ကို ထူထောင်ခဲ့သည်။ စစ်အစိုးရကမူ ၎င်းတို့အား အကြမ်းဖက်အဖြစ် ဖော်ပြခဲ့သည်။ မှတ်သားထိုက်သည်မှာ မြန်မာစစ်တပ်သည် နိုင်ငံ၏ဒေသအသီးသီးတွင် သောင်းကျန်းသူများနှင့် တိုက်ခိုက်နေခြင်းဖြစ်သည်။

…  
မတူကွဲပြားသော လူမျိုးစုများပါဝင်သည့် ထိုကဲ့သို့သော ထိပ်တိုက်ရင်ဆိုင်မှု မြင်ကွင်းနောက်ခံတွင် ပြည်တွင်းစစ်အဖြစ် အပြည့်အ၀ ပေါက်ကွဲလာမည်မှာ စိုးရိမ်ဖွယ် အမှန်ပင်ဖြစ်သည်။ ထို့အပြင် မြန်မာနိုင်ငံအတွင်း မည်သည့် ပြည်တွင်းစစ် ဖြစ်ပွားခြင်း မဆို၊ ဘင်္ဂလားဒေ့ရ်ှအတွက် အလွန်စိုးရိမ်စရာဖြစ်ကြောင်း အကြာင်းပြချက် များစွာ ရှိနေသည်။

…  
ပထမအချက်မှာ မြန်မာစစ်တပ်က အမြဲတမ်း အလွယ်တကူ ပစ်မှတ်ထားလေ့ရှိပြီး ကမ္ဘာပေါ် တွင်ဖိနှိပ်ရက်စက်မှု အများဆုံးခံစားနေရသော ဒုက္ခသည် ဘင်္ဂါလီ (မူရင်းရိုဟင်ဂျာ ဟု ဖော်ပြ) များဖြစ်သည်။ ခန့်မှန်းခြေအား ဖြင့် ဒုက္ခသည်ဘင်္ဂါလီ ၅ သိန်း မှ ၆ ခန့်မှာ ပြင်းထန်သော ကန့်သတ်ချက်များနှင့်အတူ ရခိုင်ပြည်နယ်တွင် နေထိုင်လျှက်ရှိသည်။ ယခင်ကဲ့သို့ နောက်ထပ် နှိမ်နင်းမှုတစ်ခုခု ဖြစ်ပွားလာခဲ့လျှင် အဆိုပါ ဒုက္ခသည် ဘင်္ဂါလီတို့အတွက် နယ်ခြားကို ဖြတ်ကျော်၍ ဘင်္ဂလားဒေ့ရ်ှသို့ ပြေးဝင်ရန်မှတစ်ပါး အခြားရွေးချယ်စရာမရှိတော့ပါ။

…  
လက်နက်ကိုင်အုပ်စုများနှင့် မြန်မာစစ်တပ်အကြား ထိပ်တိုက်တွေ့ကြရာမှ သောင်းကျန်းသူများအား ဘင်္ဂလားဒေ့ရ်ှတွင် ခိုလှုံစေရေး ဦးတည်လာခြင်းမှာ ဘင်္ဂလားဒေ့ရှ်အား စိန်ခေါ်လျှက်ရှိသည့် ဒုတိအချက်ဖြစ်သည်။

…  
တတိယအချက်မှာ မြန်မာလုံခြုံရေးတပ်ဖွဲ့များ၊ ဒေသခံဗုဒ္ဓဘာသာ လူရမ်းကားများနှင့် ရခိုင်ဒေသရှိ မတူကွဲပြားသော အုပ်စုများ၏ အကြင်နာမဲ့သည့် လုပ်ရပ်များမှ လွတ်မြောက်ရန် နယ်စပ်ဖြတ်ကျော် ထွက်ပြေးလာခဲ့သည့် ဒုက္ခသည်ဘင်္ဂါလီများဖြစ်သည်။ သိန်းသန်းပမာဏရှိသော ထိုသူတို့သည် ဘင်္ဂလားဒေ့ရှ်နိုင်ငံ ကော့ခ်ဘဇားတွင် ခိုလှုံလျှက်ရှိပြီး နေရပ်ပြန်ရမည့်ရက် ကျော်လွန်နေသည်မှာ နှစ်ချီကြာမြင့်ယုံမက (မြန်မာနိုင်ငံ၏အခြေအနေများက) ပို၍ပင် မသေမချာ ရှိလာနိုင်ခြင်း ဖြစ်သည်။ ထို့အပြင် အိုးအိမ်စွန့်ခွာထွက်ပြေးရသူများ၏ ဝန်ထုပ် ဝန် ပိုးကို ဘင်္ဂလားဒေ့ရ်ှအနေဖြင့် ပိုမိုထမ်းရွက်ရမည့် အန္တရာယ်ရှိနေသည်။

…    
အထက်ဖော်ပြပါ စိန်ခေါ်မှုများအပြင် မြန်မာနိုင်ငံတွင် ပြည်တွင်းစစ် အဆုံးသတ်သွားလျှင်လည်း အိမ်နီးချင်းဖြစ်သည့်အားလျှော်စွာ ဘင်္ဂလားဒေ့ရှ်အနေဖြင့် အလွန်ဆိုးရွားသော အခြားပြဿနာများနှင့် ရင်ဆိုင်ရမည့် အလားအလာများ ရှိနေပေလိမ့်မည်။

…  
ထိုကဲ့သို့သော မနှစ်မြို့ဖွယ် ဆိုးရွားလှသည့် အခင်းအကျင်းတွင် ဘင်္ဂလားဒေ့ရ်ှသည် အကောင်းဆုံးကို မျှော်လင့်မည်ဖြစ်သော်လည်း အဆိုးဆုံးအတွက် ကြိုတင် ပြင်ဆင်ထားရမည်သာ ဖြစ်သည်။ နိုင်ငံတကာနှင့်ဒေသဆိုင်ရာမဟာမိတ်များနှင့်အတူ ဘင်္ဂလားဒေ့ရှ်အစိုးရသည် မြန်မာနိုင်ငံ၏ အခြေအနေကို တိုးတက်ကောင်းမွန်စေရန် အတတ်နိုင်ဆုံး အားထုတ်ရမည်ဖြစ်သည်။ အရေးအကြီးဆုံးအချက်မှာ သောင်းကျန်းသူနှင့် မည်သည့် တစ်ဖက်နိုင်ငံသားမျှ ဝင်ရောက်မလာစေရေး မြန်မာနှင့် နယ်နိမိတ်ကို တင်းကြပ်စွာ ကာကွယ်ရန် လိုအပ်ပေလိမ့်မည်။

((ကျွန်တော့အနေဖြင့်မူ အထက်ပါအတိုင်း ထင်မြင်ယူဆခြင်း မရှိပါ။ လောလောဆယ် မြန်မာနိုင်ငံတွင် မသင်္ကာ/ဆန္ဒပြသူများအား ဖမ်းဆီးရာ၌ ပစ်ခတ်မှုများရှိနေခြင်း၊ အချို့သော မြို့ရွာဒေသတို့တွင် PDF တို့၏ ပုန်ကန်တော်လှန်ရာမှ တိုက်ပွဲများဖြစ်ပွားခြင်း မြို့ကြီးများ၌ စာသင်ကျောင်းနှင့် အုပ်ချုပ်ရေးရုံးများ ဖောက်ခွဲ-မီးရှိ့ခံရ ခြင်း။ ဒလန်ဟု စွပ်စွဲခံရသူများမှာ လုပ်ကြံ-သတ်ဖြတ်ခံရခြင်းများဖြစ်ပေါ်လျှက်ရှိုပြီး နစက၏ အုပ်ချုပ်ရေးယန္တ ယားမှာလည်း အပြည့်အ၀ လည်ပတ်ပြီဟု ဆိုနိုင်သေးချေ။

သို့သော် ထိုကဲ့သို့သော အခြေအနေတွင် တည်ရှိနေယုံနှင့် ပြည်တွင်းစစ်ဟု မသတ်မှတ်နိုင်ပါ။ 

ဟူမေရန် ခန့်မှန်းသကဲ့သို့ တိုင်းရင်းသားလက်နက်ကိုင်အားလုံး စုပေါင်းပါဝင်သည့် တိုက်ခိုက်မှုမျိုးလည်း ဖြစ်မလာနိုင်ပါ။ တိုင်းရင်းသားလက်နက်ကိုင်တို့၏ စစ်ရည်စစ်သွေးအား အထင်သေးလျှော့တွက်ခြင်း မဟုတ်ပါ။ ၎င်းတို့အသီးသီး၏ မူလရည်မှန်းချက်မှာ မြန်မာနိုင်ငံမြို့ကြီးများအား တိုက်ခိုက်သိမ်းယူရန် မဟုတ်ပဲ ၎င်းတို့ဒေသ/နယ်မြေ လွတ်မြောက်ရေး ကိုယ်ပိုင်အုပ်ချုပ်ခွင့် ရရှိရေးသာဖြစ်သည်။ ထို့ပြင် ဆယ်စုနှစ်ချီ တော်လှန်ရေးအသီးသီး လုပ်ခဲ့သူများသည် ၎င်းတို့မဟုတ်သော တစ်စုံတစ်ယောက်အား ခေါင်းဆောင်တင်ကာ စစ်တိုက်မည်ဆိုခြင်းကို မျှော်လင့်ရန် ခဲယဉ်းလှသည်။ 

လူမျိုးစုအတော်များများပါဝင်စေကာမူ ပြည်မနေ လူပုဂ္ဂိုလ်တစ်ဦး၊ ပါတီအဖွဲ့အစည်းတစ်ရပ်က သြဇာလွှမ်းမိုးစေရန် စစ်တိုက်ပေးမည်လည်း မထင်ပါ။ PDF တို့၏ စုဖွဲ့မှုသည် အင်အားကောင်း၍ ကျစ်လစ်မှု ရှိသည်ဟု မတွေ့ရပါ။ …  
သို့သော် မြန်မာတွင် တိုင်းရင်းသားလူမျိုးစု ၁၃၀ ကျော်နှင့် လက်နက်ကိုင်အဖွဲ့ပေါင်း ၁၀၀ ကျော်ရှိနေပါသည်။ စစ်အုပ်ချုပ်မှု ဖယ်ရှားရေးမှတစ်ပါး သဘောထားအမျိုးမျိုးရှိနေပါ၍ ဗုံးခွဲ-မီးရှို့-စွပ်စွဲ-လုပ်ကြံမှုများမှာမူ အချိန် ကာလအတော်ကြာ တည်ရှိနေနိုင်ပါသည်။  ။သတင်းဘာသာပြန်သူ))

#မြန်မာပြည်တွင်းစစ်အလားအလာများနှင့်ဘင်္ဂလားဒေ့ရှ်နိုင်ငံ #မီရှဲလ်ဘတ်ချလက်

((( Dhaka Tribune., June 22nd, 2021,” Commentary: Potential civil war in Myanmar – stakes are very high for Bangladesh.By:Humayun Kabir Bhuiyan.” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)))

Leave a Reply

Your email address will not be published.