Covid-19 အိန္ဒိယမျိုးကွဲဟု သုံးနှုန်းခြင်းမှာ မှားယွင်းပြီး နိုင်ငံ့ပုံရိပ်ကို အန္တရာယ်ဖြစ်စေသဖြင့် လူမှုကွန်ယက်တို့က ဖယ်ရှားပေးရန် နယူးဒေလီတောင်းဆိုကြောင်း သတင်းထွက်ပေါ်။ ဆေးသိပ္ပံဝေါဟာရကို မှားယွင်းလွတ်လပ်စွာ သုံးနှုန်းခြင်းမှာ စိတ်ပိုင်းဆိုင်ရာပြဿနာများနှင့် အကြမ်းဖက်မှုများ ဖြစ်ပွားစေခဲ့


ကိုရိုနာဗိုင်းရပ်စ်၏ အိန္ဒိယဗီဇပြောင်းမျိုးကွဲဟု သုံးနှုန်းနေကြခြင်းမှာ အခြေအမြစ်မရှိပဲ နားလည်မှုလွဲမှားစေသည့် ဝေါဟာရသာဖြစ်ကြောင်း အိန္ဒိယကျန်းမာရေးဝန်ကြီးဋ္ဌာနက ငြင်းချက်ထုတ်လိုက်ပြီးနောက် အဆိုပါ စကားလုံးအား သုံးစွဲသည့် ပို့စ်များအားလုံးကို လူမှုကွန်ယက်မီဒီယာများမှ ဖယ်ရှားပေးရန် တောင်းဆိုကြောင်း သတင်းများ ထွက်ပေါ်ခဲ့သည်ဟု Russia Today က ယနေ့ရေးသားသည်။

…    
ရိုက်တာသတင်းဋ္ဌာနနှင့် ဒေသဆိုင်ရာမီဒီယာများလက်ဝယ် ရရှိခဲ့သော အိန္ဒိယနိုင်ငံနည်းပညာဝန်ကြီးဋ္ဌာန၏ လူမှုကွန်ယက်မီဒီယာထံ ပေးပို့သော သောကြာနေ့ရက်စွဲပါ စာတစ်စောင်တွင် အိန္ဒိယနိုင်ငံနှင့် ဗိုင်းရပ်စ်၏ ဗီဇပြောင်းမျိုးကွဲခြင်းတို့ကို ချိတ်ဆက်ရန် ခိုင်မာသည့် သိပ္ပံနည်းကျ အကြောင်းပြချက် မရှိကြောင်း ဖော်ပြထားပြီး အဆိုပါ ဝေါဟာရကို အသုံးပြုသည့် မည်သည့် အကြောင်းအရာမဆို ဖယ်ရှားပေးရန် တောင်းဆိုလိုက်ကြောင်း တွေ့ရှိရသည်။

…   
နိုင်ငံအတွင်း ကိုရိုနာဗိုင်းရပ်စ်ပိုး၏ အိန္ဒိယဗီဇပြောင်းမျိုးကွဲမှာ နိုင်ငံအတွင်း ပျံ့နှံ့လျှက်ရှိကြောင်း မှားယွင်းသည့် အဓိပ္ပါယ်ဖြင့် ဖော်ပြလျှက်ရှိသည်ဟု သိရှိရကြောင်း၊ WHO ကိုယ်တိုင်အနေဖြင့် B.1.617 ကို အိန္ဒိယဗီဇပြောင်းဟု သုံးနှုန်းခြင်း မရှိကြောင်း၊ အိန္ဒိယနိုင်ငံတွင် ပထမဆုံး စတင်တွေ့ရှိပြီး B.1.617 ဗိုင်းရပ်စ်မျိုးကွဲ အဖြစ်သတ်မှတ်ကြောင်း ဖော်ပြသည့် ကမ္ဘာ့ကျန်းမာရေးအဖွဲ့၏ အစီရင်ခံစာအား ကိုးကားရေးသားထားသည်။

…  
အမည်မဖော်လိုသူ အစိုးရ၏သတင်းရင်းမြစ်တစ်ခုက ရိုက်တာအား ပြောကြားရာတွင် ၎င်းအသုံးအနှုန်းသည် အိန္ဒိယနိုင်ငံ၏ ပုံရိပ်အပေါ် အန္တရာယ်ဖြစ်စေနိုင်ကြောင်း၊ ဗိုင်းရပ်စ်ပိုး၏ ဗီဇပြောင်းလဲခြင်းမှာ အိန္ဒိယနိုင်ငံနှင့် သက်ဆိုင်သည်ဟူသော ထင်မြင်ချက် အမှားများကို သတင်းပေးရာရောက်ကြောင်း ပြောကြားသည်။

…  
B.1.617 ကို“ အိန္ဒိယဗီဇပြောင်းမျိုးကွဲ” ဟုရည်ညွှန်းသည့်မီဒီယာသတင်းများအား ကန့်ကွက်ကြောင်း ယခုလ စောစောပိုင်းတွင် အိန္ဒိယကျန်းမာရေးဝန်ကြီးဌာနက သတင်းထုတ်ပြန်ခဲ့သည်။ ကိုရိုနာဗိုင်းရပ်စ်၏ B.1.617 မျိုးရိုးဆက်ကို အိန္ဒိယတွင် ပထမဆုံးတွေ့ရှိရသည် ဟု ဖော်ပြထားသော WHO ၏ မေလ ၁၀ ရက်စွဲပါ အစီရင်ခံစာအား ရည်ညွှန်းခဲ့သည်။

…   
အလားတူ လူမှုကွန်ယက်၌ ဖော်ပြခြင်းနှင့် ပတ်သက်သည့် ဖြစ်ရပ်မျိုးကို စင်္ကာပူနိုင်ငံ၌လည်း တွေ့ရှိရသည်။ စင်္ကာပူနိုင်ငံတွင် ဗီဇပြောင်း မျိုးကွဲဗိုင်းရပ်စ်အသစ်တစ်ခုတွေ့ရှိကြောင်း ရေးသားချက်များကို ပြင်ဆင်မှုများပြု လုပ်ရန် Facebook နှင့် Twitter တို့ကို အမိန့်ပေးခဲ့သည်။ ကလေးငယ်များအတွက် အလွန်အန္တရာယ်များသော ကိုရိုနာဗိုင်းရပ်စ်ပုံစံသစ်ဖြစ်သည်ဟု စွပ်စွဲဖော်ပြချက်များ ထွက်ပေါ်လာပြီးနောက် စင်္ကာပူသို့ ပျံသန်းသော လေကြောင်းခရီးစဉ်များကို ရပ်ဆိုင်းရန် အိန္ဒိယပြည်နယ်ဝန်ကြီးချုပ်တစ်ဦးက Twitter တွင် ရေးသားပြီးနောက် ထိုသို့ ညွှန်ကြားခြင်းဖြစ်သည်။

WHO အနေဖြင့် Covid-19 ရောဂါဖြစ်ပွားမှု သို့မဟုတ် ၎င်း၏ ဗီဇပြောင်းမျိုးကွဲများကို ပထဝီ အနေအထားနှင့် ပတ်သက်၍ ဆက်စပ်ရန် တွန့်ဆုတ်နေစဉ်၊ သတင်းမီဒီယာတို့က ကျန်းမာဆိုင်ရာအကြပ်အတည်းဖြစ်နေသည့် ကာလတစ်လျှောက်လုံး၌ ကိုရိုနာဗိုင်းရပ်စ်၏ “ဗြိတိန် “ “ ဘရာဇီးလ် “ “တောင်အာဖရိက” မျိုးကွဲများအဖြစ် အကြိမ်ကြိမ် ( အချို့မှာ ရံဖန်ရံခါ ) တစ်ပြိုက်နက်တည်း ဖော်ပြလျှက်ရှိသည်။

…  
ကူးစက်ရောဂါ၏ စောစောပိုင်းအဆင့်များ၌“ တရုတ်ဗိုင်းရပ်စ်” ဟူသောဝေါဟာရနှင့် ပတ်သက်၍ အငြင်းပွားဖွယ် ဖြစ်ခဲ့ရသည်။ အဆိုပါ ရောဂါဖြစ်ပွားမှုကို တရုတ်ပြည် ဝူဟန်မြို့တွင် ပထမဆုံးတွေ့ရှိခဲ့သည်ဟု ရည်ညွှန်းခြင်းဖြစ်သည်။ အဆိုပါ ဝေါဟာရကို လွတ်လပ်စွာ အသုံးချခဲ့သူမှာ အမေရိကန်သမ္မတဟောင်း ဒေါ်နယ်ထရမ့်ဖြစ်လေသည်။ ထိုသို့ သုံးနှုန်းခြင်းဖြင့် အာရှတိုက်သားများအတွက် စိတ်ပိုင်းဆိုင်ရာပြဿနာများစွာကို ဖြစ်ပေါ်စေခဲ့ပြီး တရားတဘောင် စွဲဆိုရသည်အထိ အကြမ်းဖက်မှုများ ဖြစ်ပွားစေခဲ့သည်။

…  
စကော့တလန်ဝန်ကြီးချုပ်က သောကြာနေ့ ၎င်း၏ သတင်းစာရှင်းလင်းပွဲတွင် အိန္ဒိယဗီဇပြောင်းမျိုးကွဲဟု သုံးနှုန်းခြင်း မပြုတော့ပဲ April 02 ဟု ရည်ညွှန်းခြင်းဖြင့် ရောဂါဗိုင်းရပ်စ်ပိုးနှင့် လူ့အဖွဲ့အစည်းများ ချိတ်ဆက်ခြင်း ကို စွန့်လွှတ်ကြောင်း ထင်ရှားသည့် ကြိုးပမ်းမှု တစ်ခုဖြစ်သည်။

(( ဆေးသိပ္ပံပညာတွင် မမျိုးပွားအင်္ဂါ၏ သားအိမ်ပြွန်ကို ဖလိုပီယန်ကျု့ဒ်(ပြွန်) ဟု ခေါ်တွင်ပါသည်။ ၁၆-ရာစုနှစ် အီတလီကက်သလစ်ဘုန်းတော်ကြီး ဂေဘရီရယ် ဖလိုပီယန်က စတင်တွေ့ရှိသောကြောင့် ထိုသို့ ဂုဏ်ပြုအမည် မှည့်ခေါ်ထားခြင်းဖြစ်သည်။ အကယ်၍ မောင်မဲတူက စတင်တွေ့ရှိလျှင် မဲတူပြွန် ဖြစ်မည်မှာ သေချာပါသည်။

…  
ပညာရပ်ဆိုင်ရာ သတင်းများကို နိုင်ငံရေးအမြတ်ထုတ်၍ ကိုယ်လိုရာဆွဲသည့်အခါ ဖြစ်ပေါ်လာသော အမှားအယွင်းများမှာ လူတစ်ဦးတစ်ယောက်မှသည် နိုင်ငံတစ်နိုင်ငံ၊ လူမျိုးတစ်မျိုးသာမက တိုက်ကြီးတစ်ခုနေ လူမျိုးနွယ်အားလုံးတို့အပေါ်တွင် အထင်အမြင် လွဲမှားယုံမက စိတ်ပျက်ဒေါသဖြစ်ဖွယ် အာရှတိုက်သား မုန်းတီးခွဲခြားဆက်ဆံမှု Asian Hate များ၊ တုန်လှုပ်ဖွယ် အကြမ်းဖက်မှုများ ဖြစ်ပေါ်လျှက်ရှိသည်။

…   
ထို့ကြောင့် အိန္ဒိယနှင့် စင်္ကာပူတို့ကို အကဲဆတ်လွန်းသည်ဟု ကျွန်တော့်အနေဖြင့် အပြစ် မတင်မိပါ။ အသိဉာဏ်မြင့်မား၍ အမျှော်အမြင်ကြီးသူများသည် နောင်ဖြစ်လာမည့် နောက်ဆက်တွဲပြဿနာများကို ကြိုတင် တွက်ချက်လေ့ရှိပါသည်။

အစ္စရေး နိုင်ငံ၏ ပုံရိပ်ကို တမင်အကြိမ်ကြိမ်ဖျက်ဆီးသူများနှင့် မော့ဆက်ကဲ့သို့ အဖွဲ့အစည်းအကြောင်းကို ကြားဖူး၍လည်း ဖြစ်သည်။ ။သတင်းဘာသာပြန်သူ))

(((Russia Today., 22 May, 2021,” New Delhi asks social media firms to remove mentions of Covid-19 ‘Indian variant’ as harmful to India’s image – reports.” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)))

https://www.rt.com/news/524504-india-social-media-variant/
https://www.bbc.com/news/health-55659820
https://www.prestigeonline.com/hk/people-events/people/here-is-what-you-need-to-know-about-asian-hate/ 

0

Leave a Reply

Your email address will not be published.